Hlaut blaðamannaverðlaunin fyrir viðtal sitt við Einar Zeppelin

Blaðamannaverðlaunin voru afhent í Perlunni síðdegis í dag en þau eru veitt í fjórum flokkum.

Verðlaun fyrir viðtal ársins hlaut Snærós Sindradóttir, blaðamaður á Fréttablaðinu, fyrir viðtal sitt við Einar Zeppelin Hildarson. Í viðtalinu segir Einar í fyrsta skipti opinberlega frá örlagaríkum degi í lífi fjölskyldunnar þegar móðir hans svipti systur hans lífi og gerði atlögu að lífi hans en Einar var þá aðeins fjórtán ára gamall.

Í rökstuðningi dómnefndar segir meðal annars:

„Snærós dregur fram átakanlegar lýsingar á aðdraganda og eftirköstum voðaverksins en eins og Einar segir í viðtalinu; þá getur ekki búið mann undir atburð sem þennan.“

Viðtal Snærósar við Einar má lesa hér.

Þá hlutu þeir Gísli Einarsson, Ingólfur Bjarni Sigfússon, Karl Sigtryggsson og Ragnar Santons, fréttastofu RÚV, verðlaun fyrir umfjöllun ársins. Í rökstuðningi dómnefndar segir meðal annars:

„Sögur af bjargarlausu fólki á flótta náðu athygli landsmanna þegar innlendu fréttamennirnir sögðu þær milliliðalaust af vettvangi. Fréttirnar af flóttamannavandanum voru sagðar af áhuga og innsæi. Þær sýndu mikilvægi þess að festast ekki innan veggja fréttastofa og bíða fregna erlendra miðla.“

Blaðamannaverðlaun ársins 2015 hlaut síðan Sunna Ósk Logadóttir, Morgunblaðinu, fyrir umfjöllun um heimsókn sína í flóttamannabúðir í Líbanon, þar sem hún ræddi við sýrlenska flóttamenn og starfsmenn flóttamannabúða. Í rökstuðningi dómnefndar segir:

„Með umfjöllun sinni, bæði í texta, myndum og myndböndum, kemur Sunna til skila skýrri mynd af hlutskipti þeirra sem tekist hefur að flýja stríðsátökin í Sýrlandi og komast yfir landamærin.

Sérstaklega dregur Sunna upp skýra mynd að aðbúnaði og framtíðarhorfum barna á svæðinu sem eiga erfitt með að skilja af hverju yfirgefa þurfti daglega lífið, vinina og heimilið.“

Þá hlaut Magnús Halldórsson, Kjarnanum, verðlaun fyrir rannsóknarblaðamennsku ársins 2015 fyrir umfjöllun sína um sölu á hlutum Landsbankans í Borgun, máli sem enn sér ekki fyrir endann á. Í rökstuðningi dómnefndar segir meðal annars:

„Umfjöllun Magnúsar vegna arðgreiðslna eigenda Borgunar og um sölu Landsbankans á hlut Sparisjóðs Vestmannaeyja leiddu í ljós sterkar vísbendingar um að hagsmunum almennings hefði ekki verið gætt við söluna á Borgun.“