Kveikt í gervigrasi og ölvuð ungmenni í slagsmálum

Lögreglan á höfuðborgarsvæðinu þurfti að hafa afskipti af hjólreiðamanni sem hafði dottið við Kringlumýrarbraut laust eftir miðnætti í nótt. Hann hafði fengið áverka í andlitið eftir fallið og fram kemur í dagbók lögreglunnar að hann hafi reynst undir áhrifum áfengis.

Skömmu síðar fékk lögreglan tilkynningu um að búið væri að kveikja í gervigrasinu við Setbergsskóla í Hafnarfirði. Þegar lögreglan kom á vettvang var þó ljóst að tjónið af brunanum væri óverulegt. Ekki fylgir sögunni hvort einhver hafi verið handtekinn í tengslum við málið eða að nokkur liggi undir grun.

Það var svo á öðrum tímanum í nótt þegar lögreglan lokaði skemmtistað í austurhluta borgarinnar. Var það gert vegna fjölda ungmenna á staðnum sem aukinheldur reyndust drukkin þegar lögreglan hafði afskipti af þeim. Lögreglan hafði samband við foreldra ungmennanna og þeim gert að sækja börn sín. Þá kemur einnig fram að einn aðili hafi verið færður í fangaklefa frá umræddum skemmtistað eftir slagsmál.