Erill vegna ölvunar og skemmtanahalds

Lögreglan á höfuðborgarsvæðinu hafði í nógu að snúast í nótt vegna ölvunar og skemmtanahalds. Þá var tilkynnt um nokkrar líkamsárásir, en engin þeirra alvarleg. Klukkan fimm í morgun voru allir fangaklefar nema einn í notkun.

Samkvæmt dagbók lögreglu voru minnst tveir ökumenn stöðvaðir vegna gruns um akstur undir áhrifum fíkniefna. Þá var kona handtekinn fyrir að skemma bíla í austurborginni.

Auk þess var tilkynnt um líkamsárás í bifreið í Breiðholti. Þar voru tveir menn handteknir skömmu síðar, en ekki var um alvarlega líkamsárás að ræða.