Tryggingastofnun gert að endurskoða greiðslur til fanga

Úrskurðarnefnd velferðarmála sneri í liðinni viku við niðurstöðu Tryggingarstofnunar ríkisins þess efnis hafna umsókn fanga um dagpeninga. Talið var að reglugerð, sem stofnunin byggði synjuna sína á, ætti sér ekki stoð í lögum.

Fanginn sem um ræðir var metinn með 75 prósent örorku frá 1. ágúst 2014 til 31. október 2016. Hann sótti um dagpeninga vegna mikils tannlæknakostnaðar og fyrirséðra frekari tannviðgerða. Þá þurfi sonur hans að fara til talmeinafræðings.

Í febrúar 2015 var honum tilkynnt af Tryggingastofnuna að lífeyrisgreiðslur til hans myndu falla niður vegna refsivistar hans. Stofnunin hafi síðan síðastliðið sumar hafnað umsókn hans um dagpeninga þar sem hann þótti ekki, að mati stofnunarinnar, uppfylla þau skilyrði sem sett eru fram í reglugerð um vasapeninga og dagpeninga vegna dvalar lífeyrisþega á stofnun.

Fram til ársins 2011 var framkvæmd Tryggingastofnunar ríkisins á þann veg að öllum öryrkjum í hópi fanga voru greiddir vasapeningar án þess að sækja þyrfti sérstakelga um þá. Árið 2011 breytti stofnunin verklagi sínu á þeim grundvelli að allir refsifangar sem stunduðu ekki vinnu í fangelsum fengju greidda dagpeninga frá Fangelsismálastofnun.

Í úrskurði Úrskurðarnefndar almannatrygginga, í janúar 2013, var komist að þeirri niðurstöðu að sú breyting stæðist ekki lög. Í kjölfar þeirrar niðurstöðu var sett reglugerð sem sótti lagastoð í ákvæði almannatryggingalaga. Á grundvelli ákvæða reglugerðarinnar var fanganum synjað um vasapeninga.

Það var niðurstaða úrskurðarnefndarinnar að umrædd reglugerð skerti rétt fanga umfram það sem fram kemur í áðurnefndum lögum. Það hefði verið gert án heimildar til þess. Að mati nefndarinnar á reglugerðin sér ekki lagastoð og var málinu þegar af þeim sökum vísað til Tryggingastofnunar til nýrrar meðferðar.