Undirskriftum safnað til stuðnings gömlu konunni í Garðabæ

Barnabarn konu á níræðisaldri sem er húseigandi í Goðatúni 34 hefur ritað bænum bréf þar sem farið er fram á að bærinn kaupi óíbúðarhæft hús konunnar. Konan telur að framkvæmdir Garðabæjar í næstu götu hafi valdið skemmdum á því. Garðabær var sýknaður af 35 milljóna króna skaðabótakröfu konunnar vegna framkvæmdanna í Hæstarétti Íslands í nóvember 2014.

Ríflega tólf hundruð undirskriftum var safnað á netinu fyrir áramót þar sem farið er fram á „réttlæti fyrir gömlu konuna í Garðabæ“. Ríflega 3.600 manns eru meðlimir í samnefndum hópi á Facebook. „Það er töluverð undiralda varðandi þetta mál finnst okkur,“ segir Héðinn Birnir Björnsson, barnabarn konunnar.

Í bréfinu komi fram að gamla konan leigi nú kjallaraíbúð við knöpp kjör. Hún vilji flytja á hjúkrunarheimilið Ísafold en hafi ekki efni á því þar sem allt hennar fé hafi farið í málareksturinn.

Bæjarráð fól bæjarstjóra að setja sig í samband við málsaðila. Gunnar Einarsson, bæjarstjóri í Garðabæ, segist hafa rætt við afkomendur konunnar en engar frekari ákvarðanir hafi verið teknar í málinu.