Garðabær sýknaður af 35 milljóna skaðabótagreiðslu

Hæstiréttur segir Garðabæ ekki bera ábyrgð á stórfeldum skemmdum á einbýlishúsi eldri konu. Áður hafði héraðsdómur Reykjaness dæmt konunni, sem er 85 ára gömul, 35 milljónir í skaðabætur, en Hæstiréttur sneri dómnum við.

Konan og eiginmaður hennar keyptu húsið sem er við Goðatún í lok sjöunda áratugarins. Undirlag þessa svæðis er mýrlendi og í dómnum segir að dýpi niður á fastan jarðveg sé um eða yfir þrír metrar. Sökklar hússins ná ekki niður á fast, heldur fljóta á jarðveginum.

Árið 1979 var húsið klætt að utan og bílskúr byggður við það. Fljótlega urðu hjónin vör við sig á húsinu og þurfti að gera við gólfplötu hússins árið 1987. Konan heldur því fram að húsið hafi þá náð jafnvægi og verið stöðugt fram til ársins 2008 þegar Garðabær hóf stórfelldar framkvæmdir í næstu götu.

Hún segir framkvæmdir Garðabæjar við næstu götu hafa valdið sigi á húsinu, en það er ónýtt. Matsmaður telur kostnað við endurbyggingu þess vera rúmar 46 milljónir króna.

Árið 2008 var nýtt safnræsi lagt í Silfurtúni og liggur það 23,65 metra frá húsi konunnar. Þar að auki var akbraut Silfurtúns endurnýjuð. Matsmaður sagði þær framkvæmdir hefðu hæglega getað valdið því að titringur frá valtara hefði borist með jarðlögum í nærliggjandi hús.

Í héraðsdómi kom fram að hæðarflötur gólfs hússins væri mjög óreglulegur vegna sigs undir botnplötu, sem er brotin, og sökklum hússins. Það yrði alltaf viðkvæmt fyrir ytri breytingum. Fargaukning eða lækkun á grunnvatnsstöðu hefði áhrif á rúmmál mýrarjarðvegs og húsið fylgdi hreyfingum á honum.

Hæstiréttur segir framkvæmdirnar árið 2008 hafi ekki verið umfangsmeiri en endurgerð Goðatúns árið 1979, né hafi stærri tæki verið notuð en venjulegt sé. Vegna þess hve viðkvæmt húsið hafi verið fyrir öllum umhverfisáhrifum og að ekki hafi verið hægt að finna raunhæfar leiðir til að sem hefðu komið í veg fyrir tjónið.

„Af þeirri ástæðu hefði áfrýjandi ekki getað endurgert götuna eða lagt safnræsið þar sem hvor framkvæmd um sig gat valdið sigi á húsi stefndu vegna þess hvernig staðið var að byggingu hússins í öndverðu.“

Hæstiréttur sýknaði Garðabæ og gerði báðum aðilum að greiða sinn málskostnað. Dóminn má sjá hér.