Skoða breytingar á reglum um skipan dómara

Athugun fer nú fram í innanríkisráðuneytinu á hvaða breytingar sé rétt að gera á þeim reglum sem gilda um skipan dómara. Þetta kemur fram í svari Ólafar Nordal innanríkisráðherra við fyrirspurn Heiðu Kristínar Helgadóttur, þingmanns Bjartrar framtíðar.

Heiða Kristín spurði meðal annars hvort vinna hafi verið sett af stað við að endurskoða reglur um skipan dómara við Hæstarétt, líkt og fram hafi komið í máli ráðherra í október, að gera þyrfti og hvort hafin sé athugun á því hvernig hægt sé að tryggja ákveðna breidd nefndarmanna í dómaranefnd sem sker úr um hæfi umsækjenda í stöður dómara við Hæstarétt.

Ólöf segir í svari sínu að á meðal þeirra atriða sem séu til athugunar sé samsetning dómnefndar sem fjalli um hæfni umsækjenda og um embætti hæstaréttardómara og héraðsdómara, hlutverk nefndarinnar og þau sjónarmið sem lögð séu til grundvallar í embætti dómara.