Unglingur festi hönd í stubbahúsi og beljur stöðvuðu umferð

Tístmaraþon lögreglunnar stóð yfir í gærkvöldi og nótt en tilgangurinn með maraþoninu var að veita almenningi innsýn í starfsemi lögreglunnar. Lögreglan á höfuðborgarsvæðinu, lögreglan á Norðurlandi eystra og lögreglan á Suðurnesjum tóku þátt.

Beljur stöðvuðu umferð

Ljóst var að lögreglan á höfuðborgarsvæðinu hafði í nógu að snúast í nótt en ef rennt er yfir tíst næturinnar má sjá ýmislegt forvitnilegt.

Sum tíst voru bráðskemmtileg og sum hver nokkuð spaugileg. Til að mynda var lögreglunni á höfuðborgarsvæðinu tilkynnt um sexleytið í gær að sex beljur stæðu á Suðurlandsvegi og stöðvuðu alla umferð. Lögreglan sagði í tísti sínu að þær væru „blessunarlega í næsta umdæmi í austur,“ og því ekki á könnu lögreglunnar á höfuðborgarsvæðinu að hafa afskipti af kúnum.

Unglingur festi hönd sína í stubbahúsi

Klukkan hálf sjö í gærkvöldi barst lögreglunni tilkynning um mann, eða öllu heldur „góðkunningja lögreglunnar“ sem mældi göturnar með málverk undir hendi. Ekki liggur fyrir hvort lögreglan hafi sinnt útkallinu.

Þá var lögreglunni tilkynnt um ungling sem festi hönd sína í stubbahúsi eftir að hafa gert tilraun til þess að næla sér í sígarettu. Lögreglan fór á staðinn og tókst að ná hendi unglingsins lausri.

Seint í gærkvöldi barst tilkynning um „ákafan predikara“ sem flutti trúarlegan boðskap við lítinn fögnuð gesta í miðborginni.

Þótt mörg tístanna hafi verið kostuleg var einnig talsvert um útköll vegna ofbeldis, ölvunar, fíkniefna og slysa. Maður féll milli hæða á skemmtistað í nótt en meiðsl hans reyndust ekki eins alvarleg og talið var í fyrstu. Þá var lögreglan kölluð til vegna hópslagsmála í miðborginni í gærkvöldi. Einnig bárust lögreglunni fimm tilkynningar vegna heimilisofbeldis. 



Hér fyrir neðan má sjá hápunkta tístmaraþoni lögreglunnar.

Tilkynnt um 6 beljur sem stoppi umferð á Suðurlandsvegi, blessunarlega í næsta umdæmi í austur#hvernigfærirmaðurbelju #löggutíst

— LRH (@logreglan) December 16, 2016

Tilkynnt um söluvagn í miðborginni sem stundi vafasöm viðskipti. Okkar fólk fór á staðinn en fann engan vafasaman. #löggutíst

— LRH (@logreglan) December 16, 2016

Tilkynnt um ölvaðan ökumann á Vesturlandsvegi, rásandi. Rætt við ökumann sem var edrú en ekki viss um hvert hann væri að fara. #löggutíst

— LRH (@logreglan) December 16, 2016

Tilkynnt um óknyttaunglinga í Hafnarfirði sem fari um með háreysti og fyrirferð. #löggutíst

— LRH (@logreglan) December 17, 2016

Tilkynnt um dólga sem kasta af sér þvagi á opinberar byggingar. #löggutíst

— LRH (@logreglan) December 17, 2016

Ungmenni koma á lögreglustöð og kvarta yfir framkomu starfsmanns verslunar, rætt við þau og foreldra þeirra, leyst á viðeigandi #löggutíst

— LögreglanNorðEystra (@LogreglanNE) December 16, 2016