Tólf íslensk mörk í sigri Emsdetten

Íslendingarnir hjá Emsdetten í þýsku B-deildinni í handbolta skoruðu samtals 12 mörk í 37-28 sigri á HG Saarlouis í dag.

Oddur Gretarsson skoraði sjö mörk, þar af fjögur af vítalínunni. Ernir Hrafn Arnarson gerði þrjú mörk og Anton Rúnarsson tvö.

Sigurinn var langþráður en fyrir leikinn í dag hafði Emsdetten tapað þremur leikjum í röð. Liðið er í 8. sæti deildarinnar með 24 stig.

Fannar Þór Friðgeirsson skoraði fimm mörk þegar Eintracht Hagen tapaði 28-30 fyrir Wilhelmshavener á heimavelli.

Hagen hefur tapað sjö af síðustu átta leikjum sínum og situr í fjórða neðsta sæti deildarinnar með 15 stig.