Lögðu hald á kannabis fyrir rúmar tólf milljónir króna

Lögreglan á Suðurnesjum lagði hald á þúsundir söluskammta af kannabis í húsleit sem gerð varí umdæminu fyrir skemmstu. Að auki var umfangsmikil ræktun samskonar efna stöðvuð á sama stað. Einn var handtekinn í þágu rannsóknar málsins. Verðmæti efnanna er talið á bilinu tólf til fjórtán milljónir króna. Þetta kemur fram á Facebook-síðu lögreglustjórans á Suðurnesjum.

Í annarri húsleit í sama umdæmi var annar einstaklingur handtekinn með umtalsvert magn af kannabis og amfetamíni. Hafði hann einnig undir höndum kylfu, piparúða og reiðufé. Þá var annar einstaklingur handtekinn þegar hann mætti á staðinn í þeim tilgangi að kaupa fíkniefni.

Þá stöðvaði lögreglan á höfuðborgarsvæðinu kannabisræktun á tveimur stöðum í Hafnarfirði í dag. Í báðum tilfellum var að ræða ræktun í heimahúsi. Alls var lagt hald á um 75 plöntur. Tveir karlmenn, annar á þrítugsaldri en hinn á fertugsaldri, hafa játað aðild sína að málunum. Þetta kemur fram í tilkyningu frá lögreglunni á höfuðborgarsvæðinu.