Atli leikur Atla í O, Brazen Age

Ég leik þennan karakter sem er ákveðið tilbrigði við sjálfan mig, nema hann er bara aðeins furðulegri en ég auð­vitað,“ segir Atli Bollason, leikari og bókmenntafræðingur, sem kemur til með að birtast gestum RFF á hvíta tjaldinu í kvöld, þegar kvikmyndin O, Brazen Age verður sýnd í Tjarnarbíói. Kvikmyndin er skrifuð af vini Atla, kanadíska leikstjóranum Alexander Carson, sem einnig leikstýrir.

„Við kynntumst þegar ég var við nám í Kanada fyrir nokkrum árum, og ég lék í stuttmyndum fyrir hann á meðan ég var úti og svo aftur eftir að ég kom heim. Þær voru sýndar úti og önnur rataði á verðlaunapall stuttmynda í San Francisco, svo eitthvað sé nefnt,“ útskýrir Atli og heldur áfram: „Svo þegar hann hjólaði í sína fyrstu mynd í fullri lengd þá hafði hann samband og síðasta haust fór ég því aftur út og dvaldi mánaðarlangt við tökur.“ Myndin, sem fjallar um hóp listamanna í Toronto, er þannig upp sett að ekki er ein sérstök aðalpersóna, heldur margar sem saman skapa heildina. „Persónurnar eiga það sameiginlegt að reyna að skilja við æskuna og verða að fullorðnu fólki, og þar er ég Atli, listrænn guffalegur gaur,“ segir Atli og bætir við: „Þetta er einhvers konar þroskasaga og um leið hugleiðing um ljósmyndun, minningar og minjagripi sem dregur upp áleitna mynd af vináttu og trú á 21. öldinni.“

Segir Atli erfitt að segja til um hvort Carson hafi haft hann í huga við handritsskrifin, þó svo að sögupersónan beri sama nafn og Atli. „Ég á eftir að sjá myndina í heild sinni, svo kannski kem ég auga á það þá,“ bendir hann á og hlær lauflétt, og prísar sig eflaust sælan að geta séð myndina yfirhöfuð því minnstu munaði að hún yrði að engu. „Það kviknaði í heima hjá leikstjóranum, sem rétt svo náði að bjarga hörðu diskunum með myndinni á. Það munaði ansi litlu að öll vinnan bókstaflega fuðraði upp.“ Verður myndin sýnd þrisvar á RFF og á mánudag mun Atli sitja fyrir svörum að lokinni sýningu í Tjarnarbíói.

Hann segir RFF fyrir löngu orðna órjúfanlegan hluta af viðburðadagatalinu og lætur sig ekki vanta. „Ég ætla að sjá sem flestar myndir, en sjálfur hef ég mest gaman af að sjá myndir eftir unga leikstjóra sem eru að fara af stað, kannski búnir að gera eina eða tvær myndir,“ segir Atli spenntur fyrir komandi kvikmyndaveislu.