Hindúar vonast til að fá lóð í Reykjavík

Hindúar hafa fagnað því að ásatrúarmönnum hafi verið afhent lóð og veitt leyfi til að reisa hof í Reykjavík. Rajan Zed, einn leiðtoga hindúa í Bandaríkjunum, segir þetta jákvætt skref fyrir Ísland og Evrópu og sé merki um virkt trúfrelsi.

Líkt og fjallað var um í kvöldfréttum Stöðvar 2 í gær munu framkvæmdir á hofinu hefjast í mars. Reiknað er með því að hofið kosti 130 milljónir króna en ásatrúarfélagið hefur safnað fyrir hofinu. Reykjavíkurborg gefur hins vegar lóðina sem er um 2500 fermetrar.

Í tilkynningu hyllir Zed Reykjavíkurborg fyrir að hafa úthlutað lóðinni. Segist hann jafnframt vonast til að borgin muni úthluta hindúum lóð þegar þeir verða reiðubúnir að reisa sitt hof.

Hof ásatrúarmanna verður undir Öskjuhlíðinni skammt austan við veitingastaðinn Nauthól.

Zed segir málið bera merki þess að afkomendur víkinganna séu að leita aftur til forfeðra sinna og að heimurinn ætti að fagna slíku. Í tilkynningunni kemur fram að hann leggi áherslu á samræðu milli trúarbragða og að í sameiginlegri leit þeirra að sannleikanum sé hægt að læra af hver öðrum og þannig komast nær sannleikanum.

„Samræður geta hjálpað okkur að eyða staðaímyndum, fordómum, skopstælingum og fleira sem okkur var kennt af fyrri kynslóðum.“