KSÍ og borgaryfirvöld hrædd um að leggja ill álög á strákana okkar

Það hefur sjaldan verið jafn mikil spenna fyrir einum knattspyrnuleik og þeim sem verður leikinn á Laugardalsvelli þegar íslenska karlalandsliðið í knattspyrnu tekur á móti Kasakstan í undankeppni Evrópumótsins. Nái íslenska liðið stigi úr þeim leik er það búið að tryggja sér farseðilinn til Frakklands á næsta ári þar sem lokakeppnin fer fram og skrifa sig jafnframt í sögubækurnar.

Löngu er uppselt á leikinn og má búast við miklum fjölda í Laugardalnum og í miðborg Reykjavíkur fyrir og eftir leik. Hvorki Knattspyrnusamband Íslands né borgaryfirvöld ætla þó að hafa einhvern sérstakan viðbúnað vegna þessara mögulegu tímamóta og fæst ekki betur heyrt en menn séu ekkert sérlega hrifnir af því að breyta út af vananum og hafa þannig mögulega áhrif á gengi liðsins. Í daglegu tali er það nefnt að jinx-a eitthvað, tekið af enska orðinu jinx, sem mætti þýða sem að leggja ill álög á einhvern.

Enginn risaskjár í Laugardal

Vísir hafði til að mynda sambandi við KSÍ til að spyrjast fyrir um hvort sambandið hefði hug á því að koma risaskjá fyrir utan Laugardalsvöll svo fleiri geti notið stemningarinnar sem þar verður.

„Við viljum ekki jinx-a neitt hér,“ segir Hilmar Þór Guðmundsson, sem starfar við  fjölmiðla- og markaðsmál hjá KSÍ, léttur í bragði þegar Vísir bar þetta undir hann. „Það er ekkert sem er á okkur vegum eða hefur komið til tals hjá okkur. Við höfum náttúrlega um nóg annað að hugsa varðandi leikinn og framkvæmdina á leiknum þannig að það hefur þannig séð ekki komið upp á borð hjá okkur,“ segir Hilmar sem á von á sömu umgjörð og fyrir aðra leiki á Laugardalsvelli í þessari undankeppni.

„Það verður engu breytt þannig séð. Við erum líka að fara eftir reglum UEFA (evrópska knattspyrnusambandsins) þannig að það er voða lítið sem við getum gert til að breyta. Við gerum engar róttækar breytingar fyrir þessa leiki enda myndum við ekki vilja breyta neinu miðað við hvernig gengur og vera að jinx-a þetta eitthvað.“

Vill hvorki fagna of snemma né auglýsa hátíðarhöld

Þá hefur það einnig verið rætt hvort borgin muni hafa einhvern viðbúnað vegna leiksins því búast má við miklum fjölda fyrir og eftir leik. Þegar Dagur B. Eggertsson borgarstjóri var spurður að því hvort borgin muni loka einhverjum götum eða veita skemmtistöðum leyfi til að hafa opið lengur svaraði hann því neitandi enda það hjátrúarfullur að hann vill hvorki fagna of snemma eða auglýsa einhver hátíðarhöld fyrir fram.

„Gærdagurinn var auðvitað magnaður og þvílík stemning í borginni. Ég held að götunum hafi sjaldan verið slitið jafnlítið, því fólk gekk á skýi,“ segir Dagur. Sunnudagurinn er svo stóri dagurinn þar sem miðpunkturinn fyrir leik og á meðan leik stendur verður auðvitað í Laugardalnum.

Dansað á hverju götuhorni

„KSÍ og stuðningsmannasveitin Tólfan hafa verið að þróa það með glæsibrag undanfarin ár. Það er ótrúlega stemmning að heyra og sjá stórar stuðningssveitir koma gangandi og syngjandi úr öllum áttum. Á meðan á leik stendur verður stór skjár á Ingólfstorgi og allt til alls ef leikurinn fer vel, sem við auðvitað vonum. Ég er hins vegar svo hjátrúarfullur að ég vil hvorki fagna of snemma né auglýsa einhver hátíðarhöld fyrir fram. Veitingastaðir verða vitanlega á sínum stað en með hefðbundna opnunartíma. Ég gæti hins vegar trúað að einhverjir þeirra myndu setja hátalara úr á stétt snemma kvölds ef sigur næst. Því þá verður auðvitað dansað á hverju götuhorni!“

Það er því ljóst að lang flestir eru á tánum fyrir þennan stóra leik á sunnudag og lang flestir búnir að læra það af landsliðsþjálfaranum Lars Lagerbäck að það er algjör óþarfi að breyta út af vananum á meðan vel gengur.