30 spurningar til að spyrja barnið í stað „hvernig var í skólanum?“

Kannastu við að spyrja barnið alltaf að því sama þegar það kemur heim eftir skóla: „Hvernig var í skólanum?“ eða eitthvað á þá leið. Og að barnið svari „fínt“ eða „gaman“ af litlum áhuga. Til eru betri leiðir til að ná sambandi við börn sín ef marka má samantekt blaðakonunnar Söru Goldstein frá því í byrjun september.

Goldstein upplýsir að hún hafi sjálf sótt son sinn í skólann fyrsta daginn í 4. bekk. Hún hafi spurt af áhuga, „hvernig var í skólanum“ og fengið staðlaða svarið „fínt“. Daginn eftir var svarið við sömu spurningu, „tja, það var enginn að hegða sér eins og fífl.“

Leit hún í eigin barm og taldi sig geta betur, við heimskulegri spurningu fást nefnilega heimskuleg svör.

Á fjölskylduvefnum Samveru hafa spurningarnar þrjátíu verið þýddar yfir á íslensku en þær má sjá hér að neðan.

1. Hvað fékkstu að borða í hádegismat?
2. Sástu einhvern bora í nefið?
3. Hvað lékuð þið ykkur við í frímínútum?
4. Hvað var það fyndnasta sem gerðist í dag?
5. Var einhver mjög góður við þig í dag?
6. Varst þú góður við einhvern í dag?
7. Hver fékk þig til að brosa í dag?
8. Hver af kennurum þínum heldurðu að væri líklegastur til að lifa af innrás uppvakninga? Af hverju?
9. Hvað lærðir þú nýtt í dag?
10. Hver kom með girnilegasta nestið í dag? Hvað var það?
11. Hvaða áskoranir þurftir þú að takast á við í dag?
12. Ef skólinn væri tívolí, hvaða tæki myndir þú fara í? Af hverju?
13. Hvaða einkunn gæfir þú deginum í dag á bilinu 1 til 10? Af hverju?
14. Ef einn af bekkjarfélögum þínum gæti verið kennari í einn dag, hver myndi hann vera? Af hverju?
15. Ef þú mættir vera kennari í einn dag, hvað myndir þú kenna bekknum þínum?
16. Var einhver að pirra þig í skólanum í dag?
17. Hver vildirðu að væri vinur þinn sem er ekki vinur þinn í dag? Af hverju eruð þið ekki vinir?
18. Hver er mikilvægasta regla kennarans þíns?
19. Hvað er vinsælast að gera í frímínútum?
20. Minnir kennarinn þig á einhvern sem þú þekkir? Hvernig?
21. Segðu mér frá einhverju sem þú komst að um vin þinn í dag.
22. Ef geimverur kæmu í skólann og tækju með sér þrjá krakka, hverja myndir þú helst vilja að þeir tækju með sér? Af hverju?
23. Hvað gerðir þú í dag til að vera hjálplegur?
24. Hvenær varstu stoltastur af sjálfum þér í dag?
25. Hvaða reglu var erfiðast að fylgja í dag?
26. Segðu mér frá einu sem þú myndir vilja læra áður en skólaárið klárast?
27. Hvaða bekkjarfélagi finnst þér vera ólíkastur þér?
28. Hvar í skólanum finnst þér skemmtilegast að vera?
29. Í hverju viltu verða betri í á leikvellinum í skólanum?
30. Er einhver í bekknum sem á erfitt með að fylgja fyrirmælum?