Steig óvænt á svið með Wu-Tang Clan

„Þetta var ótrúlega gaman og stendur klárlega upp úr hjá mér,“ segir hinn tólf ára gamli Alex Birgisson sem fékk að stíga á svið með rapphljómsveitinni Wu-Tang Clan á sunnudagskvöldið. Athygli vakti þegar rappsveitin bauð nokkrum krökkum að koma upp á svið og dansa með þeim og hafa gaman uppi á sviði.

Alex var fyrsti krakkinn sem fékk að fara upp á svið, ásamt vini sínum Nóa Snævari Hallgrímssyni, en liðsmenn rappsveitarinnar voru duglegir að bjóða krökkum upp á svið á tónleikum sínum en um tíu krakkar voru á sviðinu þegar flest var.

Þegar Alex fékk afmælisgjöfina sína, sem var miði á hátíðina, grunaði hann ekki að hann myndi stíga á svið með rappsveitinni en það er þó ekki allt. „Ég fékk þrisvar sinnum að fara upp á svið á hátíðinni. Fyrst fékk ég að fara upp á svið með rapparanum GKR en var samt ekkert lengi uppi á sviði. Svo fékk ég líka að fara upp á svið með Shades of Reykjavík en Wu-Tang Clan stendur að sjálfsögðu upp úr. Ég hafði enga hugmynd um þetta þegar ég mætti á svæðið,“ segir Alex glaður í bragði.

Hann var staddur fremst í áhorfendaskaranum á tónleikum Wu-Tang Clan og brá heldur betur í brún þegar að einn meðlimur sveitarinnar náði augnsambandi við hann. „Við Nói vorum að syngja með og svo allt í einu var ég bara „ó mæ gad“, hann horfði í augun á mér. Hann benti svo með hendinni eins og ég ætti koma upp á svið og hvíslaði að öryggisverðinum að ég ætti koma upp. Svo kom öryggisvörðurinn og hélt á okkur upp á svið,“ útskýrir Alex. Þeir félagar fóru upp á svið þegar sveitin var að leika sitt þriðja lag og fengu að vera þar nánast alla tónleikana. „Þegar það voru tvö lög eftir vorum við beðnir um að fara af sviðinu og okkur boðið að fara baksviðs. Við vorum þar þangað til þeir kláruðu og fengum þá að taka myndir af okkur með þeim.“

Alex er mikill rappunnandi og kann texta sveitarinnar vel. „Ég kann alveg mikið af textum með þeim. Ég var kannski enginn rosalegur aðdáandi fyrir tónleikana en þetta eru lög sem maður hefur heyrt mjög lengi. Ég er mun meiri Wu-Tang Clan-aðdáandi í dag.“ 

Alex fékk á dögunum dj-sett frá föður sínum í afmælisgjöf og er að reyna að hefja sinn eigin rappferil. „Mig langar mikið að byrja að rappa og sérstaklega eftir svona upplifun,“ bætir Alex við en hans uppáhaldsrappari er Erpur „Blaz Roca“ Eyvindarson.