Segja okkur græða 52 milljarða á hraðlestinni á þrjátíu árum

Jákvæð áhrif hraðlestar milli Keflavíkurflugvallar og Vatnsmýrar á umhverfi og samfélag verða talsverð, segir í skýrslu Fluglestarinnar þróunarfélags ehf. sem vinnur að verkefninu.

Fram kemur að hraðlestin sem knúin verði með rafmagni fái það frá HS Orku. „Nákvæmt mat á félagslegum og umhverfislegum áhrifum verður gert sem hluti af undirbúningi lestarinnar,“ segir í skýrslunni.

Jákvæð umhverfisáhrif felist í talsvert skertum útblæstri gróðurhúsalofttegunda með minnkandi akstri bíla sem nota jarðefniseldsneyti. Við hönnun verði meðal annars litið til loftgæða, hávaða og titrings, landslags og sjónrænna áhrifa.

Þá verði lagt mat á félagsleg áhrif á borð við ferðamynstur, útivist, ferðaþjónustu, landnotkun og skipulagsmál.

„Félagslegur ávinningur af lestinni hefur verið reiknaður út, með tilliti til umhverfisráhrifa og ágóða notenda og aukins öryggis í umferðinni,“ segir í skýrslunni. Miðgildi úr spám geri ráð fyrir að á þrjátíu árum verði ávinningurinn fyrir notendur, samfélagið og almenning um 368 milljónir evra – sem svarar til um 52 milljarða króna.

„Spáin lítur eingöngu til notenda, félagslegs ávinnings varðandi öryggismál og umhverfisáhrif og taps á skatttekjum af jarðefnaeldsneyti vegna minnkandi bílaumferðar,“ segir í skýrslunni sem unnin er af RRV Consulting.

Efasemdir hafa komið fram um hraðlestarverkefnið á samfélagsmiðlum á undanförnum dögum. Til dæmis frá Stefáni Jóni Hafstein, starfsmanni Þróunarsamvinnustofnunar, sem kveðst fara oft um Keflavíkurflugvöll.

Stefán bendir meðal annars á þægindi einkabíla og segir þá og rútur auk þess væntanlega almennt verða orðnar rafknúnar þegar lestin eigi að fara af stað árið 2024.

„Vatnsmýrin er í fæstum tilvikum endastöð íslenskra og erlendra ferðamanna heldur lykkja á leið þeirra,“ segir Stefán í ítarlegri færslu um málið á síðu sinni á Facebook.

Stefán leggur til aðra lausn. „Með því að kaupa fjölda rafknúinna léttvagna og gera sérstaka akrein fyrir þá 30 kílómetra leið millli KEF og Hafnarfjarðar og þaðan með ólíkum leiðum á ýmsa staði strax árið 2016-17 má koma upp víðtæku umhverfisvænu og frekar ódýru dreifikerfi um allt höfuðborgarsvæðið á einu bretti. Bingó.“