Glowie hitar upp fyrir Jessie J.

„Þetta er ekkert smá, ég er í skýjunum en á sama tíma brjálæðislega stressuð líka,“ segir Sara Pétursdóttir, eða Glowie,­ sem hita mun upp fyrir Jessie J. sem heldur tónleika í Laugardalshöll þann 15. september næstkomandi. „Ég átti ekki von á þessu þannig séð, þegar Sindri sagði mér frá þessu fyrst var ég frekar róleg, enda þarf Jessie að samþykkja hver hitar upp fyrir hann, og fannst ólíklegt að hún myndi samþykkja mig, Glowie, sem hefur bara gefið út eitt lag,“ útskýrir Glowie, skýjum ofar.

Svo leið tíminn og ekki heyrðist múkk í Jessie, svo það kom ansi flatt upp á Glowie þegar í ljós kom að hún hefði verið valin. „Ég hef alltaf verið aðdáandi hennar, og það sem heillar mig mest er þessi fáránlega stjórn á röddinni. Þegar ég var yngri reyndi ég nákvæmlega við þetta, og draumurinn alltaf að ná að beita þessari tækni og hafa þessa stjórn sem hún hefur.“

Glowie segir því mikla vinnu fram undan, en líkt og áður segir hefur hún aðeins sent frá sér eitt lag, No More, sem hefur notið gífurlegra vinsælda í sumar.



„Ég er núna að vinna með nokkur í viðbót, svo það má segja að það verði eitthvað um frumflutning á efni frá mér á tónleikunum,“ segir Glowie og gefur lesendum loforð um að allir muni finna eitthvað fyrir sig, en ekkert aldurstakmark er á tónleikana, þótt börn yngri en tólf ára skuli vera í fylgd með fullorðnum. Segir í tilkynningu frá tónleikahöldurum að vissara sé fyrir yngri börn að hafa með sér eyrnatappa og gott sé að halda þeim frá miðri þvögunni, þar sem stemningin eigi vafalaust eftir að verða gríðarleg og hávaðinn eftir því, enda um stórtónleika að ræða.