Rafmagnið færði ljós í bæinn og létti störfin

Rafmagnið færði fólki ljós og létti því störfin. Í dag er erfitt að hugsa sér lífið án rafmagns en hvenær kom þessi orkugjafi inn í líf okkar Íslendinga? Því er auðvelt að fletta upp á sýningu sem var opnuð í Ljósafossstöð í gær. Þar er það raforkan sjálf og áhrif hennar á samfélagið sem um er fjallað.

Sýningin er meðal þess sem Landsvirkjun efnir til vegna fimmtíu ára afmælis á árinu. Með því að bregða upp sögum úr fortíðinni upplifa gestir sýningarinnar þróunina til dagsins í dag og hversu fljótt þessi orkugjafi var mikilvægur þáttur í daglegu lífi fólks.

Sýningin er gagnvirk með áherslu á leik og upplifun, þar sem eðli og eiginleiki raforku birtist í margvíslegum myndum því sýningargestir eru leiddir inn í heim raforkunnar á nýjan og skapandi máta.



Undirstöðuatriði rafmagnsfræðinnar eru útskýrð í gegnum einfaldar, skemmtilegar og fallegar tilraunir sem hafa leitt til mikilvægra skrefa í rafmagnssögunni.

Ljósafossstöð var gangsett árið 1937 og stendur við útfall Úlfljótsvatns. Með tilkomu stöðvarinnar var framboð rafmagns fjórfaldað á höfuðborgarsvæðinu sem gerði íbúum kleift að nota rafmagnseldavélar í stað kolavéla. Þáttur í því að auka raforkunýtingu frá Ljósafossstöð var að bjóða íbúum höfuðborgarsvæðisins að fá eldavél frá Rafha í áskrift með rafmagninu.

Sigurður Guðmundsson arkitekt teiknaði Ljósafossstöð í fúnkisstíl og hana prýðir verk eftir Ásmund Sveinsson myndhöggvara.

Gagarín og Tvíhorf arkitektar eru hönnuðir sýningarinnar og fjöldi fyrirtækja og sérfræðinga kom að uppsetningunni.