Gaman að læra ný lög

Sigurrós Ásta kveðst hafa ákveðið að taka þátt í söngkeppni barnanna á Þjóðhátíð og valið lagið Í réttu ljósi, sem er úr Ávaxtakörfunni.



„Ég æfði lagið fimm sinnum á dag vikuna fyrir þjóðhátíð,“ segir hún og er ánægð yfir að hafa unnið.

Hún kveðst ekki hafa sungið opinberlega áður nema á litlum tónleikum í söngskólanum sínum, Söngskóla Maríu Bjarkar, en segist ekkert hafa verið stressuð þegar hún fór upp á sviðið í Herjólfsdal.

„Ég er ekkert feimin,“ útskýrir Sigurrós Ásta sem syngur mikið dags daglega. „Ég syng mjög mikið því mér finnst það svo skemmtilegt og gaman að læra ný lög.“

En fer hún oft til Eyja? „Nei, ekkert oft en ég er mikið þar á sumrin. Ég fór þrisvar þangað í sumar og ég fer alltaf á Þjóðhátíð.“

En hvernig finnst henni að ferðast í skipi? „Það er mjög gaman að vera uppi í glugga að horfa út á sjó og svo fæ ég oft ís í skipinu.“