Hausinn fullur af hugmyndum

Höfuðverk er yfirskrift sýningar sem var opnuð í Anarkiu Listasal í Hamraborg um miðjan síðasta mánuð. Þar gefur að líta verk eftir tólf ólíka listamenn sem öll eru unnin úr hauskúpum hrúta. Jóhannes Óskar Sigurbjörnsson, bóndi á Þorgrímsstöðum á Vatnsnesi, stendur á bak við sýninguna en hann hefur um nokkurt skeið fengist við að hreinsa og vinna höfuðkúpur og bein hinna ýmsu dýra og skapa úr þeim listmuni undir merkinu Natural Bones Design.

Síðastliðið vor datt Jóhannesi Óskari í hug að fá til liðs við sig hóp listamanna og fékk hver um sig í hendur hauskúpu af hrút og var uppálagt að nota hana sem efnivið í listaverk. Útkoman er afar fjölbreytt. Afraksturinn er sýndur í Anarkiu, ásamt hreinum hauskúpum frá Jóhannesi Óskari. 

Jóhannes Óskar hafði gert talsvert af vegglistaverkum úr hauskúpunum en langaði að prófa að gera úr þeim fleiri muni. „Ég var með hausinn fullan af hugmyndum en komst bara ekki yfir að framkvæma þær allar. Þá datt mér í hug að fá fleiri til liðs við mig. Útkoman kom mér skemmtilega á óvart og þarna eru jafnt skúlptúrar sem nytja- og listmunir.

Sjálfur var Jóhannes Óskar spenntur fyrir því að koma ljósi inn í kúpurnar og fékk eigendur fyrirtækisins Ljósberans Skermagerðar til að aðstoða sig við að búa til óvenjulegan lampa „Ég laumaði honum með á sýninguna undir dulnefninu Kropor Mazz, en þau hjá Ljósberanum voru sjálf með upplýsta, útskorna kúpu.

En hvernig voru þátttakendurnir valdir? „Ég lagði upp með að vera bæði með þekkta og lítt þekkta listamenn. Þetta er ýmist fólk sem ég hafði samband við eða frétti af verkefninu og kom að máli við mig. Á opnuninni kom svo upp hugmynd um að gera þetta enn viðameira og er aldrei að vita nema af því verði,“ segir Jóhannes Óskar. 

Sýningin hefur að hans sögn fengið góðar viðtökur og mætti fjöldi fólks á opnunina. „Mér er sagt að það hafi verið mjög vel mætt miðað við árstíma og gaman að þetta skuli vekja athygli.“

Jóhannes Óskar hefur lengi haft brennandi áhuga á listum; jafnt tónlist, myndlist og nytjalist. „Ég bý yfir miklum sköpunarkrafti og finnst gaman að vinna með efnivið sem aðrir myndu flokka sem rusl.“

Jóhannes Óskar nálgast beinin aðallega í sláturhúsinu á Hvammstanga og þarf að vinna þau umtalsvert svo þau sómi sér vel á vegg eða sem annars konar heimilisprýði. „Það þarf að sjóða hausana og þrífa hornin vel til að fjarlægja alla fitu. Svo þarf að saga hornin til og koma þeim aftur á hausana.“ Jóhannes Óskar er hvergi nærri hættur og hefur verið að prófa sig áfram með refa-, fugla- og hvalabein svo dæmi séu nefnd.

Aðspurður segir hann útlendinga sérstaklega áhugasama um kúpurnar og hefur fengið talsvert af pöntunum að utan. „Ætli okkur Íslendingum þyki þetta ekki meira hversdagslegt.“

Sýningin í Anarkiu stendur til 16. ágúst en þar er opið alla daga nema mánudaga frá 15-18. Áhugasömum er jafnframt bent á Facebook-síðuna Natural Bones Design.