Kornflögur og strá á meðal viðfangsefna

Í dag verður opnuð sýningin Kyrralíf / Still Life í Kunstschlager.

Þar sýna nítján listamenn jafn mörg verk og er markmið sýningarinnar að vekja upp samtal við kyrralífið og tilraun til að sjá hvað gerist þegar hið gamla mætir hinu nýja.

„Kyrralífið er gamalt hugtak sem er oft tengt við til dæmis ávexti, borðbúnað og þetta hefðbundna málverk og við erum svolítið að poppa það upp,“ segir Helga Páley Friðþjófsdóttir, einn af meðlimum Kunstschlager sem jafnframt á verk á sýningunni.

„Við fengum hvern og einn listamann til þess að teygja þetta hugtak og leika sér með það. Þeir velja sér einhvern hlut og vinna út frá honum,“ segir Helga, en dæmi um hluti sem unnið var með eru strá, kornflögur, steinn og uppþvottagrind.

Helga segir hópinn skemmtilega fjölbreyttan og nálganirnar ólíkar og verður verkunum stillt upp á ólíkan máta.

Listamenn sem taka þátt í sýningunni eru þau Auður Lóa Guðnadóttir, Arna Óttarsdóttir, Björk Viggósdóttir, Bergur Thomas Anderson, Starkaður Sigurðarson, Sindri Leifsson, Skúli Árnason, Ragnar Már Nikulásson, Ragnar Jónasson, Loji Höskuldsson, Ívar Glói Gunnarsson, Helga Páley Friðþjófsdóttir, Hrefna Sigurðardóttir, Logi Bjarnason, Einar Garibaldi Eiríksson, Þuríður Rós Sigurþórsdóttir, Þór Sigurþórsson, Þórhildur Jónsdóttir og Þorvaldur Jónsson.

Kunstschlager er í D-sal Hafnarhússins og verður sýningin opnuð klukkan 15.00 og stendur til 9. ágúst næstkomandi.