Heimsþekktur grínari kemur til landsins

„Ég er gríðarlega spenntur fyrir þessum snillingi og hef mikið fylgst með honum. Hann er frábær uppistandari í alla staði,“ segir Jón Gunnar Geirdal, sem er einn af aðstandendum uppistandsins með hinum heimsþekkta grínara Josh Blue, sem kemur fram í Háskólabíói þann 4. september næstkomandi á vegum Komedy.

Josh Blue er margverðlaunaður uppistandari og sigraði bæði uppistandskeppni á uppistandshátíðinni í Las Vegas árið 2004 og í uppistands raunveruleikaþættinum Last Comic Standing á NBC árið 2006. Undanfarin ár hefur hann farið um allan heim og skemmt fólki. Þá var hann einnig fyrsti maðurinn til að vera með uppistand í spjallþætti Ellen DeGeneres. Hann hefur komið fram og skemmt í fjölda þátta eins og Live with Regis and Kelly og Comics Unleashed.

Blue er fatlaður og gerir mikið grín að sjálfum sér. Hann er með yfir 3,5 milljónir áhorfa á myndbönd sín á Youtube og þá hefur uppistandið hans, Sticky Change notið mikilla vinsælda á Netflix.

Miðasala á uppistandið hefst eftir verslunarmannahelgi á midi.is.