Fékk afmælissönginn sunginn af Páli Óskari

„Þetta var klárlega einn skemmtilegasti afmælisdagur sem ég hef upplifað. Það er ekki slæmt að fá Pál Óskar Hjálmtýsson til að syngja fyrir sig afmælissönginn ásamt 500 gestum á sveitaballi í Ýdölum,“ segir Friðgeir Bergsteinsson athafnamaður. Hann fagnaði á sunnudaginn þrjátíu ára afmæli sínu en þó svo að dagurinn hafi einkennst af talsverðri vinnu fékk hann afmælissönginn sunginn af þungavigtarmönnum í íslensku tónlistarlífi.

„Palli söng fyrir mig eftir miðnætti aðfaranótt sunnudags og þegar ég kom í bæinn á sunnudaginn þá heyrði ég afmælissönginn í útvarpinu á Rás 2 frá Sniglabandinu sem var ansi skemmtilegt,“ segir Friðgeir léttur í lundu.

Friðgeir hefur starfað sem aðstoðarmaður margra af helstu tónlistarmönnum þjóðarinnar frá árinu 2003 og því margar kanónurnar í tónlistarheiminum sem sendu honum heillaóskir.

Á afmælisdaginn fór afmælisdrengurinn einnig á leik með KR í Pepsi-deild karla, en hann er einn helsti aðdáandi liðsins og ákváðu KR-ingar að gefa honum afmælisgjöf. „KR vann leikinn 3–0 þannig að þeir gáfu mér eitt mark á hvern tug,“ segir Friðgeir og hlær. 

Hann ætlar að fagna þrítugsafmælinu næstkomandi fimmtudag og má búast við mörgum andlitum úr heimi tónlistarinnar og líka úr knattspyrnuheiminum, því hann er einnig mikilvægur meðlimur í Tólfunni, sem er stuðningsmannasveit íslenska landsliðsins í knattspyrnu og eins og fyrr segir einn helsti KR-ingur landsins.

„Það ætla nokkrir snillingar að koma fram í veislunni eins og Hreimur Örn, Eyþór Ingi, Valdimar Guðmundsson, Erna Hrönn og margir fleiri. Ég hlakka mikið til að eiga frábæra stund með vinum og þeim sem standa mér næst, þó svo ég þurfi því miður að missa af KR-leik en ég hef ekki misst af KR-leik í ansi langan tíma,“ segir Friðgeir fullur tilhlökkunar.