„Þetta er eins og stórt fyrirtæki. Ég hugsa um félagsmennina sem starfsmenn sem ég þarf bæði að stýra og þjónusta, einkum þegar mikið stendur til eins og nú þegar Íslandsmótið í golfi er fram undan,“ segir Guðmundur Sigvaldason, framkvæmdastjóri Golfklúbbsins Leynis á Akranesi.
Golfklúbburinn Leynir var stofnaður 1965. Stofnfélagar voru 22 en nú eru um 400 manns í klúbbnum og endurnýjun stöðug, að sögn Guðmundar. „Við erum alltaf að reyna að hlúa að grasrótinni í víðum skilningi þess orðs.“
Leynir hefur alið af sér góða kylfinga á landsvísu. Hvað þekktastir eru Birgir Leifur Hafþórsson og Valdís Þóra Jónsdóttir.
„Margir eldri kylfingar klúbbsins hafa einnig orðið Íslandsmeistarar, til dæmis formaðurinn, Þórður Emil Ólafsson,“ lýsir Guðmundur og ber líka lof á starfsmenn klúbbsins. Þá segir hann staðsetningu vallarins hafa sitt að segja fyrir framgang íþróttarinnar á Akranesi.
„Garðavöllur er í útjaðri bæjarins og í göngufæri fyrir Akurnesinga. Hann er fjölsóttur enda léttur fyrir fótinn og þægilegur fyrir alla aldurshópa. Þó ekki auðveldur þegar út í alvöruna er komið heldur ögrandi keppnisvöllur sem getur refsað.“
Leynir heldur um 40 mót á sumri og auk þess stórmót árlega fyrir Golfsambandið. Nú hefst Íslandsmótið þar 23. júlí og Guðmundur á von á fjölda fólks.
„Það er mikil tilhlökkun hjá okkur að halda þetta mót sem hefur verið í undirbúningi í á þriðja ár. Við ætlum að gera upplifun keppenda og gesta sem besta.“
Arsenal
Leeds
