Bandarískir plöturisar banka á dyrnar

„Toppurinn var að komast í útvarpið, en svo allt í einu er ég komin á topplista útvarpsstöðvanna, og allt farið að rúlla, “ segir hin átján ára Sara Pétursdóttir, sem gengur undir listamannsnafninu Glowie.

Lagið hennar No more hefur heillað landann upp úr skónum og klífur hvern vinsældarlistann á fætur öðrum á íslenskum útvarpsstöðvum, en margir hverjir telja um erlenda poppskvísu að ræða við hlustun, slíkur er bragurinn á laginu. Eru þrjú önnur lög væntanleg í spilun í sumar.

Nú er svo komið að erlend plötufyrirtæki hafa sýnt Glowie áhuga, en hún er í slagtogi við hið hæfileikaríka teymi, Stop.Wait.Go., sem hefur heldur betur gert garðinn frægan, nú síðast með framlagi Íslands til Eurovision.

„Allt byrjaði þetta svoleiðis að ég vann Söngkeppni framhaldsskólanna árið 2014, fyrir hönd Tækniskólans í Reykjavík. Þar nam ég hárgreiðslu, og upp úr því hafði Pálmi Ásgeirsson samband við mig fyrir hönd hópsins og langaði til að vinna með mér,“ segir Glowie sem greip gæsina að sjálfsögðu um leið og hún gafst.  „Á þessu tímabili voru þeir mikið úti í Los Angeles og nóg að gera, svo þetta fór hægt af stað.“

Lagið er komið frá piltunum en Glowie flytur það, ásamt aðkomu Stony, Þorsteins Sindra Baldvinssonar, YouTube-stjörnu með meiru. 

„Þetta er náttúrulega bara geggjað, og ég átti aldrei von á að þetta myndi ganga svona vel,“ segir Glowie, og bætir við að sannarlega sé hún að upplifa stóra drauminn, sem alltaf hefur verið að meika það í músíkinni. Spurð út í nafnið Glowie, segir hún sig hafa langað til að skapa sér sína sérstöðu þar sem Stop.Wait.Go. hópurinn hafi þegar verið með tvær Sörur á sínum snærum. 

„Sara er mjög flott nafn,en mig langaði að hafa mitt eigið. Upphaflega langaði mig mikið að hafa það ítalskt, þar sem ég er einn sextándi ítölsk,“ segir hún og skellir upp úr. Eftir töluverðar vangaveltur fram og til baka varð nafnið Glowie að lokum fyrir valinu, enda nokkuð þjált á erlendri grund sem og hér heima. 

Segist Glowie nú vinna hörðum höndum við að búa til öflugan pakka sem hægt verði að sýna plöturisunum, en kýs að segja ekki meira um stöðuna að svo stöddu. gudrun@frettabladid.is