Helgi, Dóri og Valur berjast um Jóhönnu

Það hafa eflaust margir velt því fyrir sér hvenær íslensk uppsetning af söngleiknum Mamma Mia verði gerð en nú þarf ekki að bíða mikið lengur.

Í mars á næsta ári mun Borgarleikhúsið setja upp söngleikinn sem saminn er í kringum öll bestu Abba-lögin. Flestir ættu að kannast við kvikmyndina sem gefin var út árið 2008 og sló rækilega í gegn hjá Íslendingum en með aðalhlutverk í myndinni fer leikkonan Meryl Streep.

Haldnar voru „sing-a-long“ sýningar í Háskólabíó og hefur samnefndur söngleikur notið talsverðra vinsælda í London og New York.

Pabbarnir þrír

Mannskapurinn sem stendur að sýningunni hér á landi er ekki af verri endanum. Þórarinn Eldjárn sér um þýðingu handritsins, Jón Ólafsson mun annast tónlistina og Unnur Ösp Stefánsdóttir verður leikstjóri sýningarinnar.

Leikhópurinn er blandaður og samanstendur af bæði þekktum andlitum og nýjum. Jóhanna Vigdís Arnardóttir fer með hlutverk Donnu og Þórunn Arna Kristjánsdóttir leikur dóttur hennar, Sophie.

Pabbarnir þrír verða leiknir af Helga Björnssyni, Val Frey Einarssyni og Halldóri Gylfasyni. Brynhildur Guðjónsdóttir og Maríanna Klara Lúthersdóttir leika vinkonur Donnu og Eysteinn Sigurðarson verður brúðguminn.

„Við kláruðum að ráða í öll hlutverk fyrir nokkrum vikum, héldum stórar prufur og ég gæti ekki verið ánægðari með hópinn,“ segir Unnur Ösp.

Erfitt að fá réttinn

Þetta er ekki í fyrsta skiptið sem Borgarleikhúsið setur upp stóra fjölskyldusýningu en á seinustu árum hefur þar meðal annars verið sett upp Billy Elliot og Mary Poppins.

„Við höfum lengi haft augastað á Mamma Mia en það er erfitt að fá réttinn á þessari stórsýningu og við vildum fá að gera hana á okkar hátt með okkar besta fólki,“ segir Kristín Eysteinsdóttir borgarleikhússtjóri og heldur áfram: „Þessi sýning hefur verið sýnd úti um allan heim en það hafa alltaf verið afar strangar reglur um að sýningin þurfi að nota nákvæmlega sömu leikmynd og dansa og upprunalega sýningin en við vildum auðvitað fá að gera sýninguna að okkar og taka hana þannig upp á næsta stig og við erum í skýjunum yfir því að vera fyrsta leikhúsið í heiminum sem býðst sá réttur að hafa algert listrænt frelsi þegar kemur að uppsetningunni.“

Algjör gleðisprengja

„Við verðum með afar skemmtilegar lausnir á framsetningu, þökk sé því frábæra listafólki sem við erum búin að fá með okkur í lið,“ segir Kristín. Grímuverðlaunahafinn Ilmur Stefánsdóttir sér um leikmyndina, Filippía Elísdóttir hannar búningana og Lee Proud semur dansana.

Sýningin verður af svipaðri stærð og stærstu söngleikir Borgarleikhússins hafa verið.

„Leikhópurinn verður í kringum 35 manns og auðvitað spilar hljómsveit undir. Við ætlum að tjalda öllu til og gera þennan söngleik að algjörri gleðisprengju,“ segir Unnur Ösp.