Nike-gleðskapur leggur undir sig Gamla bíó

Mikið er um að vera í Gamla bíói í kvöld þegar hið margumtalaða Sneakerball Nike-teiti fer þar fram.

Þetta er í annað sinn sem viðburðurinn fer fram hér á landi og í fyrra mættu um 1.500 manns en teitið er lokað og einungis boðsmiðar sem veita aðgang.

Mikið er lagt í tónlistaratriðin en þeir sem koma fram eru Gísli Pálmi, Úlfur Úlfur og Benni B-Ruff. „Ég verð með svipað sett og ég var með á Sónar. Þá er ég að blanda saman minni tónlist og annarra manna tónlist og er líka að blanda saman dj-setti og læf-setti,“ segir Benedikt Freyr Jónsson, betur þekktur sem Benni B-Ruff, spurður út í hans tónleika í teitinu. Með honum á sviðinu verða þau Ari Bragi Kárason trompetleikari, söngkonan Matty og Charlie Marlowe.

Gísli Pálmi hefur notið gífurlegra vinsælda og nýja platan hans fengið frábæra dóma og þá er Úlfur Úlfur einnig nýbúin að senda frá sér nýja plötu. 

Sneakerball-partí sem þessi eru haldin víðs vegar um heim til að kynna vörumerkið Nike og þurfa þeir aðilar sem sækja partíið að vera í Nike-skóm.

„Ég hef alltaf verið mikill Nike-maður og Jordan-maður og hef fílað Nike síðan það poppaði upp þegar maður var polli. 23 verður líklegast fyrir valinu í kvöld,“ segir Benni B-Ruff spurður út skóbúnaðinn. Stuðið hefst klukkan 21.00 og fólk þarf að verða sér úti um boðsmiða ef það ætlar að upplifa hina einstöku Nike-dýrð.