Þessi tuðandi týpa býr í mörgum okkar

„Ég er hrifin af ranti og tuði yfirleitt, og þá sérstaklega fólki sem tuðar ofan í bringuna á sér og gerir ekkert í neinu,“ segir Viktoría Blöndal, ein þeirra sem útskrifast af sviðshöfundabraut sviðslistadeildar Listaháskólans.

Verk hennar, Kvikasilfur hafsins, fjallar um konu sem býr í trillu niður á höfn. „Þessi kona hefur farið svolítið á hnefanum í gegnum lífið, dálítið á skjön við samfélagið og farið sínar eigin leiðir,“ segir hún.

Viktoría byrjaði að skrifa verkið 2013 og segir hún tuðandi aðalpersónuna vera byggða á mörgum manneskjum sem hún þekkir eða hefur þekkt og jafnvel sjálfri sér líka.

„Þessi týpa býr í mörgum, en það eru fáir sem þora að viðurkenna það.“ Verkið verður frumflutt í dag og fékk Viktoría sjö aðila til þess að flytja það.

„Þetta eru leikarar, rapparar og alls konar fólk. Þau eru að sjá textann í fyrsta sinn svo þetta verður algjörlega óleikstýrt, óæft og hrátt,“ en flytjendur verða þau Anna Katrín Einarsdóttir, Sigurbjartur Sturla Atlason, Arnar Freyr Frostason, Baltasar Breki, Íris Tanja, Ingvar Eysteinsson og Bylgja Babýlons.

Við skriftir eyddi Viktoría miklum tíma niðri við höfn og þakkar hún hafnarvörðum sérstaklega fyrir aðstoðina. „Ég fékk alveg yndislegt skrifborð hjá þeim þar sem ég gat unnið og klárað verkið. Það er alveg magnað að geta klárað háskólanámið sitt með því að skrifa þessa kellingu úr mér.“

Verkið verður sýnt í sal Hjálpræðishersins í Kirkjustræti 2 kl. 18 í dag, laugardag, á mánudag 25. maí klukkan 19 og fimmtudag 28. maí klukkan 19 og er hluti af útskriftarsýningu nemenda sviðslistadeildar Listaháskólans.