Launahá Lawrence

Leikkonan Jennifer Lawrence hefur skrifað upp á samning þess efnis að hún fái 20 milljónir Bandaríkjadala fyrir hlutverk sitt í myndinni Passengers.

Auk Lawrence hefur verið tilkynnt að Chris Pratt fari einnig með aðalhlutverk í myndinni en Lawrence fær tvisvar sinnum hærri laun fyrir framlag sitt.

Samningurinn hefur komið leikkonunni í hóp leikara á borð við Leonardo DiCaprio, Bradley Cooper og Robert Downey Jr. sem allir þiggja dágóðar summur fyrir verkefni sín.

Þessi tíðindi koma stuttu eftir umræðu um launamun kynjanna í Hollywood þegar tölvupóstar frá Sony láku á internetið og kunngert var að Lawrence og Amy Adams fengju lægri laun en karlkyns mótleikarar þeirra í myndinni American Hustle.

Framleiðsla á Passengers er ekki hafin en myndinni verður leikstýrt af Susanne Bier.