Kim fann fleiri sjálfsmyndir

Kim Kardashian West gaf á dögunum út bókina Selfish sem er safn af sjálfsmyndum, en hún hefur einkar gaman af því að taka slíkar myndir.

Af nógu var að taka en einhverjar myndir fóru fram hjá Kardashian við vinnslu bókarinnar og tilkynnti Kardashian á Twitter-reikningi sínum að hún væri alveg miður sín yfir því að hún hefði fundið frábærar sjálfsmyndir frá því hún keyrði systur sína Khloe í fangelsi sem ekki hefðu ratað í bókina.

Kardashian sagðist mjög leið, þetta væru frábærar myndir og leitaði hún ráða hjá aðdáendum sínum um hvað hún ætti til bragðs að taka, hvort hún ætti að birta þær á netinu eða bæta þeim við í endurprenti af bókinni, þær væru einfaldlega of góðar til þess að þær fengju ekki að líta dagsins ljós og auk þess vektu þær upp minningar.

Áhugasamir geta fjárfest í bókinni á vefsíðunni Amazon.com.