Segir nágranna ganga of langt með kæru

„Ég get ekki fullyrt að hundarnir hafi aldrei valdið ónæði og ég hef beðist velvirðingar á því í svari til heilbrigðisnefndarinnar. En núna finnst mér þetta gengið of langt,“ segir Elma Cates um kvartanir undan hundum sem hún á.

Íbúi við Fífuvelli í Hafnarfirði er ósáttur við hundahald nágranna sinna en hann segir að mikið ónæði skapist í hverfinu vegna þessa. Maðurinn telur að nágrannarnir stundi hundarækt án tilskilinna leyfa.

Maðurinn kvartaði í september í fyrra yfir hundahaldi nágranna sinna við Furuvelli til heilbrigðiseftirlitsins sem hafnaði þeirri beiðni að takmarka hundahald nágrannanna og úrskurðarnefnd umhverfis- og auðlindamála staðfesti síðar þá afgreiðslu.

Maðurinn benti á að í reglugerðum um hundahald segði að ef aðili gerist uppvís að því að stunda starfsleyfisskylda starfsemi án leyfa beri að stöðva hana. Vegna fjölda hunda á heimili nágrannans væri í raun um starfsskylda starfsemi að ræða.

„Það er bara ekki rétt,“ segir Elma Cates. „Ég hef leyfi fyrir fjóra hunda og á fjóra hunda,“ segir hún.

Þó segir Elma að stundum passi hún hunda dætra sinna og þá séu þeir fleiri á heimilinu.

„Hingað komu fulltrúar frá eftirlitinu og skoðuðu aðstöðuna og sögðu að hér væri allt til fyrirmyndar.“