Villi Vill hefði orðið sjötugur í dag: "Elvis Íslands fyrir mér“

Söngvarinn ástsæli Vilhjálmur Vilhjálmsson hefði orðið sjötugur í dag en hann var fæddur 11. apríl árið 1945. Vilhjálmur hóf söngferil sinn með hljómsveitinni Busabandinu árið 1961 þegar hann var við nám við Menntaskólann á Akureyri. Fram að þeim tíma hafði hann ekki mikla trú á tónlistarhæfileikum sínum og stefndi ekki á frama á því sviði. Vilhjálmur kom þó úr mikilli tónlistarfjölskyldu. Hann var yngstur fimm systkina og ólst upp á Merkinesi í Höfnum á Suðurnesjum. Faðir hans, Vilhjálmur Hinrik Ívarsson, var þekktur harmonikuleikari og söngmaður en eldri systir hans var, eins og alþjóð veit, söngkonan Ellý Vilhjálmsdóttir.

Vilhjálmur fylgdi fyrrverandi meðlimi úr Busabandinu, Þorvaldi Halldórssyni, og fór að syngja með Hljómsveit Ingimars Eydal árið 1965, um svipað leyti og hann lauk námi við menntaskólann. Hann söng inn á tvær plötur með hljómsveitinni og vann strax hylli þjóðarinnar með lögum eins og Litla sæta ljúfan góða og Vor í Vaglaskógi.

Vilhjálmur hætti í hljómsveit Ingimars Eydal og fluttist til Reykjavíkur til að hefja tannlæknanám. Hann sagði þó ekki skilið við tónlistina og vann fyrir sér með því að syngja með Hljómsveit Magnúsar Ingimarssonar sem lék á veitingahúsinu Röðli öll kvöld vikunnar. Vilhjálmur hætti tannlæknanáminu eftir tvö ár og helgaði sig alfarið tónlistinni.

Vilhjálmur söng inn á fjórar plötur með systur sinni Ellý, sú fyrsta, Systkinin Vilhjálmur og Ellý syngja saman, kom út árið 1969. Allar plöturnar nutu mikilla vinsælda og varla er til sá Íslendingur sem ekki getur raulað með jólaplötu þeirra systkina. 

Eftir að hafa lokið flugnámi árið 1970 flutti Vilhjálmur til Lúxemborgar en kom þó reglulega heim í frí og söng inn á plötur. Hann gaf út sólóplötu árið 1972 sem sló rækilega í gegn, platan innihélt vinsæl lög eins og Bíddu pabbi og Ó mín kæra vina. Árið 1976 kom svo út platan Með sínu nefi þar sem Vilhjálmur söng lög sem hann lét semja við ljóð Kristjáns frá Djúpalæk. Söngferill Vilhjálms spannaði þó ekki langan tíma, en hann lést sem kunnugt er langt fyrir aldur fram í bílslysi í Lúxemborg árið 1978. Vilhjálmur lét eftir sig þrjú börn. 

Friðrik Ómar hefur undanfarin ár komið víða við og sungið lög Vilhjálms. „Ég kynntist honum gegnum útvarp sem barn og hef haldið upp á hann síðan,“ segir Friðrik. „Ég er með svona skemmtilega gamaldags tónlistarsmekk, það mætti eiginlega segja að Villi Vill sé svona Elvis Íslands fyrir mér.“

Í tilefni af afmælinu verða haldnir tónleikar í Eldborgarsal Hörpu í kvöld þar sem Friðrik Ómar flytur ásamt góðum gestum fjölda laga sem Vilhjálmur gerði ódauðleg á ferli sínum. Tónleikarnir verða síðan haldnir í Íþróttahúsinu í Neskaupstað 17. apríl og í Menningarhúsinu Hofi á Akureyri þann átjánda.