SNL stjörnur: Þekktir grínistar leita að íslenskum leikurum

Bandarísku grínistarnir Seth Meyers, Fred Armisen og Bill Hader leita nú að íslenskum leikurum í hlutverk í þætti í nýrri þáttaröð sem þeir semja og leika í.

Þáttaröðin ber titilinn American Documentary og verður einn þátturinn tekinn upp hér á landi. Þættirnir eru í svokölluðum „mockumentary“-stíl; þeir eru látnir líta út fyrir að vera heimildarmynd, þrátt fyrir að vera í raun skrifaðir. Sem dæmi um þætti í svipuðum stíl má nefna Spinal tap, en „mockumentary"-formið hefur einnig verið nýtt í þáttum á borð við The Office og Parks and Recreation, en báðir þættirnir nutu gífurlegra vinsælda vestanhafs.

Þátturinn sem tekinn verður upp hér á landi mun fjalla um Ísland. Seth Meyers hélt upp á afmælið sitt hér á landi í desember á síðasta ári og ferðaðist þá um landið ásamt eiginkonu sinni, mannréttindalögfræðingnum Alexei Ashe. 

Fyrirtækið Zik zak kvikmyndir starfar með framleiðendum þáttaraðarinnar og sér Nanna Kristín Magnúsdóttir um að skipa í hlutverk. Alls leita framleiðendurnir að þrjátíu íslenskum leikurum í stór sem smá hlutverk. 

Þeir Fred Armisen, Seth Meyers og Bill Hader eru vel þekktir í Bandaríkjunum. Þeir léku saman í gamanþáttunum vinsælu Saturday Night Live frá 2005 til 2013, auk þess sem Meyers var einn af handritshöfundum þáttanna. Félagarnir hafa leikið í fjölda kvikmynda og sjónvarpsþátta. Meyers stýrir nú sínum eigin spjallþætti á NBC-sjónvarpsstöðinni. Fred Armisen er með Meyers í þáttunum, en sá fyrrnefndi stýrir hljómsveitinni í þáttunum. Armisen byrjaði einmitt feril sinn í skemmtanabransanum sem tónlistarmaður.

Mikil spenna ríkir fyrir þáttunum American Documentary, en þeir verða sýndir á IFC-sjónvarpsstöðinni, sem hefur í gegnum tíðina sérhæft sig í að sýna svokallaðar sjálfstæðar kvikmyndir og þætti sem falla ekki að dagskrárstefnu stærri sjónvarpsstöðvanna í Bandaríkjunum.

Til dæmis hefur verið sagt frá nýjum þáttunum á vefsíðu Variety. Þar kemur fram að nýja þáttaröðin verði hluti af nýrri og bættri dagskrá á IFC, sem þykir hafa sótt í sig veðrið undanfarin ár. Hver þáttur verður hálftími að lengd og hafa samningar náðst um sex þætti.

Hér að neðan má sjá skemmtilegan „sketsa" með þeim félögum úr Saturday Night Live og öðrum þáttum.