Telja afnám hafta verða trúverðugra með evru

Það skiptir íslensku bankana verulegu máli hvernig til tekst við losun haftanna, sagði Stefán Pétursson, framkvæmdastjóri fjármálasviðs Arion banka, á fundi endurskoðunarfyrirtækisins KPMG í gær. Fundurinn bar yfirskriftina „Úr höftum með evru“.

„Ein af stóru niðurstöðum allra lánshæfisfyrirtækja um Ísland er sú að það er óvissan um það hvernig höftunum verður lyft sem gerir það að verkum að íslenska ríkið er í neðsta fjárfestingarflokki. Það er ekki það að við séum með höft, heldur það að við vitum ekki hvernig við ætlum að lyfta þeim,“ sagði Stefán. Hann benti á að allir þeir ráðgjafar sem við hefði verið rætt teldu að ef höftum yrði lyft með farsælum hætti þá kæmist Ísland í a-flokk í lánshæfi. Þetta myndi þýða miklu betri lánskjör fyrir ríkissjóð og þar af leiðandi miklu betri lánskjör fyrir banka og fyrirtæki í kjölfarið.

Á fundinum var kynnt ný skýrsla með sviðsmyndagreiningu á losun fjármagnshafta með upptöku evru. Nýja skýrslan er framhald af skýrslu sem gefin var út vorið 2014 um líkleg áhrif af losun fjármagnshafta.

Í sviðsmyndagreiningunni er unnið út frá þeirri forsendu að ákvörðun hafi verið tekin um inngöngu í Evrópusambandið með upptöku evru. Gert er ráð fyrir að heildstæð áætlun um losun hafta og upptöku evru yrði mótuð og henni framfylgt.

KPMG stillir upp fjórum ólíkum sviðsmyndum. Ein þeirra ber yfirskriftina Íslenski draumurinn, þar sem gert er ráð fyrir hraðri losun hafta og hagvexti í helstu viðskiptalöndum. Önnur er Vonarneisti þar sem gert er ráð fyrir hraðari losun hafta en samdrætti í helstu viðskiptalöndum. Þriðja heitir Lága drifið þar sem er gert ráð fyrir hægri losun hafta og samdrætti í helstu viðskiptalöndum. Sú fjórða heitir Línudans þar sem gert er ráð fyrir hægri losun hafta og hagvexti í helstu viðskiptalöndum.

Það er niðurstaða þessarar sviðsmyndagreiningar að hraðara losunarferli hafi í för með sér auknar sveiflur í efnahagslífinu, sem orsakast að stórum hluta af þróun krónunnar. „Áhrifin af afnáminu verða miklu vægari og síður öfgafull ef evran er í farvatninu, umhverfið verður stöðugra, minni sveiflur í krónunni, stöðugra og lægra vaxtastig og meiri kaupmáttur,“ sagði Svanbjörn Thoroddsen, endurskoðandi og meðeigandi hjá KPMG, þegar hann kynnti skýrsluna.