Ásdís Rán nýtt andlit alþjóðlegs fyrirtækis

„Ég var í viðræðum við fyrirtækið í desember, þannig að þetta er bara nýkomið upp,“ segir Ísdrottningin og fyrirsætan Ásdís Rán Gunnarsdóttir en hún er nýtt andlit fyrirtækisins Onecoin.

Um er að ræða alþjóðlegt fyrirtæki sem hefur þróað rafrænan gjaldmiðil og fer ört stækkandi.

„Ég er sérstakur gestur og „host“ á Extravaganza gala event sem þeir standa fyrir í Hong Kong núna á næstu dögum. Þetta verður eflaust mjög skemmtilegt og spennandi, enda hef ekki farið til Kína áður,“ segir Ásdís Rán.

Hún fer af stað um miðjan janúarmánuð en ferðalagið er ansi langt. „Ég verð að ferðast í fimm daga en stoppa bara í tvær nætur í Hong Kong fyrir viðburðinn og blaðafundi og svo aftur heim, þannig að mesti tíminn fer í að komast þangað,“ segir Ásdís Rán og hlær.

Hún hefur áður verið andlit fjölda þekktra alþjóðlegra fyrirtækja og er reynslumikil á þessu sviði. Ísdrottningin hefur verið búsett hér á landi undanfarið ár, eftir að hafa búið í Búlgaríu um nokkurt skeið, þar sem hún vakti mikla lukku og var meðal annars valin fegursta kona Búlgaríu.