Styrktartónleikar Mikka litla

„Hann veit ekkert betra en ís, og þá er allavega hægt að tryggja að hann fái nóg af ís,“ segir Valdís Anna Jónsdóttir, móðursystir Mikaels Smára, sem stendur á bak við tvenna styrktartónleika.

„Mikki litli er þriggja ára gamall og er með sjúkdóminn ataxia telangiectasia, sem er ólæknandi erfðasjúkdómur sem leggst á tauga- og ónæmiskerfið. Í stuttu máli þá munu útlimirnir hans lamast, og hann mun á endanum til dæmis ekki geta kyngt,“ segir Valdís. „Hann er kominn með hjólastól, sem hann elskar og finnst gríðarlegt sport að fá að rúnta um í. Hann kallar stólinn hlaupastól,“ útskýrir Valdís og bætir við að hér sé á ferðinni mikill stuðbolti sem elskar fátt meira en að grínast, knúsa, gera töfrabrögð og svo auðvitað ís.

„Maður verður svo lítils megnugur þegar maður stendur frammi fyrir svona veikindum, og mann langar svo mikið að hjálpa en veit ekki hvernig maður á að fara að því. Þess vegna ákváðum við að hjóla í styrktartónleika til að geta að minnsta kosti aðstoðað þau við að draga úr fjárhagsáhyggjunum sem fylgja,“ segir Valdís aðspurð um tilurð þessara tónleika.

„Það hefur verið magnað að vinna að þessu, það eru allir svo tilbúnir til að leggja sitt á vogarskálarnar og hver einn og einasti hefur gefið vinnuna sína.“

Má með sanni segja að saman sé komið stórskotalið íslenskra tónlistarmanna sem mun leggja Mikka lið, en fyrri tónleikarnir fara fram í Fríkirkjunni í Reykjavík á fimmtudagskvöldið og munu þar stíga á svið listamenn eins og Regína Ósk, Erna Hrönn, Svavar Knútur, Ragnheiður Gröndal og fleiri. „Við munum svo endurtaka leikinn á Akureyri viku síðar, og þá með öðru tónlistarfólki, svo sem Eyþóri Inga, Hvanndalsbræðrum, Gospelkór Akureyrar og Þórhildi Örvars, svo einhver nöfn séu nefnd.“

Mun miðaverð vera 2.500 krónur og renna óskipt í styrktarsjóð Mikaels Smára. Frekari upplýsingar um tónleikana má nálgast hér