Verzlingar munu fá slúðrið beint í símann

Verzlunarskólanemar mega búast við því á næsta skólaári að geta nálgast smáforrit sem sendir þeim allt nýjasta slúðrið innan veggja skólans beint í farsímann þeirra.

Að smáforritinu stendur slúðurblað skólans en Kristófer Karl Jensson, einn af forsprökkum blaðsins, segir að búið sé að útvega forritara og að appið fari líklega í þróun í næstu viku.

„Þessi hugmyndin poppaði bara upp og okkar fannst hún fyndin og sniðug en pælingin var í rauninni að fá bara smá slúðurmenningu í skólann,“ segir Kristófer.

Verzlingum muni gefast færi á að senda nafnlaust slúður í gegnum smáforritið sem þeir áframsendi svo á alla nemendur sem hafa náð sér í forritið.

Kristófer segir að þeir muni þó ritskoða allt það sem sent verður út með appinu svo að það fari ekki út fyrir öll velsæmismörk, jafnvel í samráði við skólastjórnendur en það hefur ekki verið ákveðið að svo stöddu. Þá verði þeir einstaklingar sem eiga í hlut ekki nafngreindir heldur verður einungis gefið út í hvaða bekk viðkomandi er.

„Það gerir þetta meira mysterious og skemmtilegt og það fær fleiri til að pæla í þessu,“ segir Kristófer. Aðspurður um mikilvægi sannleikgildis slúðursins segir hann það ekki vera aðalatriðið. „Nei, það skiptir engu máli. Okkur er alveg sama. Það er bara skemmtilegra ef þetta er eitthvað kjaftæði.“

Einungis Verzlingum mun standa þetta smáforrit til boða, sem ekki hefur fengið nafn ennþá, og býst Kristófer við því að senda lykilorð á nemendur skólans með haustinu.