Kött Grá Pjé milli steins og sleggju: Klippa eða safna?

„Sjálfur reyni ég að hugsa ekki um þetta, það er ekki þægilegt að hafa þessar neglur en þær eru orðnar svo langar og fallegar,“ segir rapparinn Kött Grá Pje, sem hefur aldeilis verið að gera garðinn frægan með tónlistinni sinni en hann steig meðal annarra á svið á Airwaves-hátíðinni um liðna helgi.

Segist hann koma nokkuð vel undan hátíðinni. „Ég er pínu þreyttur, raddlaus og hamingjusamur og er ekki frá því að draumagiggið mitt hafi farið fram á Húrra, aðfaranótt sunnudagsins. Ég er hálf klökkur yfir viðbrögðunum sem ég fékk þar,“ segir hann.

Þar vakti hann ekki aðeins athygli fyrir tónlistarflutning, en rapparinn skartaði stæðilegum nöglum sem margir hafa eflaust horft öfundaraugum á. Segist hann hafa safnað umræddum nöglum í heilan mánuð fyrir hátíðina og hefur hugsað einkar vel um þær.

„Ég valdi mér nýjan túrkisbláan lit fyrir þessa helgi, en hef mikið verið að vinna með fjólubláan. Þennan bláa sá ég og kolféll fyrir honum,“ segir rapparinn. Spurður hvort það sé tímafrekt að halda nöglunum snyrtilegum, með tilliti til þess að Airwaves-tónlistarhátíðin verður seint lögð að jöfnu við afslöppun, sér í lagi fyrir tónlistarmennina sem fram koma, segist hann hafa notið þeirrar blessunar að engin hafi brotnað og bætir við: 

„Ég lakkaði þær þrisvar sinnum þessa helgi, svona til að halda þeim alveg góðum.“

Kött Grá Pje segist alltaf hafa haft smekk fyrir fallegum nöglum, og lekkerum litum, en segist þó ekki endilega skarta lökkuðum alla daga.

„Nei, það er nú allur gangur á því hjá mér. En ég lakka þær oftast ef ég er að fara að gera eitthvað fínt, svona upp á punt,“ svarar hann til. „Ég hef heldur ekki alltaf lakkað á mér neglurnar, það er nú svona frekar nýtilkomið. Ég held þetta tengist því að ég sé að þroskast.“

Í samfélagi þar sem fyrirframgefnar hugmyndir um hvað geti talist karlmannlegt hefur heldur hallað á naglalökkun karla, en Kött Grá Pje segist ekki hafa orðið fyrir neinu sérstöku flóði athugasemda. „Þvert á móti reyndar og merkilegt nokk, þá hef ég bara fengið jákvæð viðbrögð.“

Erfitt er að láta sér rapparann úr greipum renna án þess að spyrja hvert leyndarmálið sé á bak við jafn sterkbyggðar neglur og stendur ekki á svörum: „Ég held að þetta sé mikið osti að þakka. Ég borða mikinn cheddar-ost og hef svona sterkar neglur, það gæti alveg verið ástæðan.“