Ólafur Ólafsson kominn á Kvíabryggju

Ólafur Ólafsson, fyrrum hluthafi í Kaupþingi, hefur hafið afplánun vegna dóms sem hann hlaut í Al-Thani málinu svokallaða. Samkvæmt heimildum Vísis var Ólafur fluttur úr Hegningarhúsinu á Kvíabryggju í gær. DV greindi fyrst frá.

Páll Winkel fangelsismálastjóri sagði í viðtali við Vísi daginn sem dómurinn féll í Hæstarétti að viðmiðið væri að dómþolar væru teknir fyrr inn á boðunarlista eftir því sem dómur væri þyngri. Óski menn hins vegar eftir því við Fangelsismálastofnun að hefja afplánun sem fyrst sé orðið við þeirri ósk.

„Staðan er þannig ef einhver einstaklingur óskar eftir því að komast í afplánuna, það á jafnt við um þá sem eru að koma í sína fyrstu afplánun og síbrotamenn, að það er reynt að verða við því. Það er ekki algengt að menn vilji fara strax í afplánun,“ segir Páll Winkel í samtali við Vísi. Hann vill þó ekki tjá sig um einstök mál.

Hæstiréttur dæmdi Ólaf í fjögurra og hálfs árs fangelsi fyrr í mánuðinum fyrir aðild sína að Al-Thani málinu svokallaða, en auk Ólafs hlutu Hreiðar Már Sigurðsson, Magnús Guðmundsson og Sigurður Einarsson dóma. Hæstiréttur þyngdi dómana sem Ólafur og Magnús hlutu í héraði um eitt ár.

Hæstiréttur þyngdi dóm Héraðsdóms Reykjavíkur um eitt ár sem hafði dæmt Ólaf í þriggja og hálfs árs fangelsi. Ólafur hefur kært íslenska ríkið til Mannréttindadómstóls Evrópu fyrir brot á málsmeðferð.

Aldrei lengur í fangelsi en í tvö ár

Páll segist í samtali við Vísi í dag ekki getað tjáð sig um einstök mál. Aðspurður hvort að maður sem hlýtur fjögurra og hálfs árs dóm uppfylli skilyrði til að afplána á Kvíabryggju segir Páll svo geta getið.

„Fangelsismálastofnun verður að taka mið af fullnustu refsinga þar sem skilyrði koma fram um það hverjir mega afplána í opnum fangelsum, líkt og Kvíabryggju. Meðal þess sem við þurfum að taka tillit til er að menn séu ekki lengur en tvö til þrjú ár í opnum fangelsum. Við þurfum að taka mið af brotaferli, hvort viðkomandi komi inn á réttum tíma, óloknum málum og svo framvegis,“ segir Páll.

„Tökum mann sem fær fimm ára fangelsisdóm sem dæmi. Hann fær þá reynslulausn eftir helming tímans eða tvo þriðjuhluta tímans ef hann er að afplána sinn fyrsta dóm vegna þess að lög um fullnustu refsinga gera ráð fyrir því. Ef viðkomandi fær reynslulausn eftir tvo þriðjuhluta tímans þá eru það um þrjú ár.

Ef við erum að tala um maður sé tvö til þrjú ár í opnu fangelsi þá er afplánunarferlið þannig að þú kemur inn í lokað fangelsi – Hegningarhúsið - og ferð svo í ákveðinn tíma í opið fangelsi ef þú uppfyllir skilyrðin. Svo kemur líka til frádráttar vistun á áfangaheimili Verndar og að lokum er svo afplánun undir rafrænu eftirliti. Maður sem fær fimm ára dóm er því aldrei í fangelsi lengur en í tvö ár. Hann fer á Vernd í eina sex mánuði og fimm mánuði undir rafrænt eftirlit.“

Páll segir það þó alveg skýrt að ef einhver brýtur af sér í opnu fangelsi – „dettur í það“ eða brýtur reglur fangelsisins - þá sé hann umsvifalaust fluttur í lokað fangelsi. „Það gerist reglulega, nokkrum sinnum á ári.“

Ekki náðist í Hákon Árnason, lögmaður Ólafs, við vinnslu fréttarinnar.