Sigmundur segir kaupmátt landsmanna eiga eftir að aukast vegna niðurstöðu SALEK

sunna karen sigurþórsdóttir skrifar 28. október 2015 11:03

Sigmundur Davíð Gunnlaugsson forsætisráðherra segir að þegar sé farið að draga úr verðbólguþrýstingi vegna niðurstöðu SALEK-hópsins. vísir/valli

Sigmundur Davíð Gunnlaugsson forsætisráðherra segir að áhrifa nýundirritaðs samkomulags í kjölfar niðurstöðu SALEK-hópsins svokallaða eigi eftir að gæta strax. Þegar sé það farið að að draga úr verðbólguþrýstingi og væntingum um verðbólgu til framtíðar.

„Ég vona að þetta muni strax koma í veg fyrir það sem ella hefðu orðið neikvæð áhrif. Við erum á tímum núna þar sem fram undan eru verulegar launahækkanir. Þær hefðu líklega, því miður, horfið að miklu leyti í verðbólgu hefðum við ekki náð saman um þessa framtíðarsýn sem nú hefur verið undirritaður,“ sagði Sigmundur Davíð í Bítinu á Bylgjunni í morgun.

Neytendur verði að vera á varðbergi

„Það breytir þó ekki því að við verðum að vera á varðbergi. Atvinnurekendur verða að reyna eins og þeir mögulega geta að halda aftur að verðlagshækkunum og neytendur verða að vera á verði.“

Heildarsamtök launafólks og atvinnurekenda á almennum og opinberum markaði skrifuðu í gær undir samkomulag um breytt vinnubrögð við gerð kjarasamninga. Samkomulagið er afrakstur af vinnu SALEK-hópsins, sem starfað hefur með hléum frá árinu 2013, og nær til sjötíu prósent launafólks. Sigmundur fagnar þessu nýja samkomulagi og segir það eiga eftir að bæta kaupmátt landsmanna.

„Maður er búinn að fylgjast með þessu í tvö ár. Stundum hefur þetta litið vel út og stundum ekki, og stundum nánast virst vonlaust. En menn fóru í það núna, allir í sameiningu, fulltrúar ríkisins, atvinnurekendur á almennum markaði og launþegahreyfinganna að gera eina tilraun enn. Vegna þess að menn sá að hér var komið upp hættuástand enn á ný, þar sem útlit var fyrir að verðbólgan gæti farið á skrið. Við gætum aftur lent í sömu hringavitleysunni þannig að það vissu allir að það var til mikils að vinna,“ segir hann.

Þá segir hann að með samkomulaginu muni launahækkanir nú hafa minni áhrif á verðbólgu en áður. „Að menn stilli saman strengi og nýti þau tækifæri sem eru í atvinnulífinu til að framleiða meiri verðmæti og að sú verðmætasköpun skili sér í hækkandi launum. Að menn fari ekki fram úr verðmætaaukningunni þannig að hagsmunirnir haldast í hendur hjá atvinnurekendum og launþegum að búa til meiri verðmæti og að það sé tryggt að þeirri verðmætasköpun sé skilað áfram.“

Hlusta má á viðtalið við Sigmund í spilaranum hér fyrir neðan.