Sameinaður sköpunarkraftur

Það verður mikið um að vera í Íshúsi Hafnarfjarðar um helgina. Í dag taka íbúar þess þátt í Lifandi laugardegi í miðbæ Hafnarfjarðar og á morgun verður Sjómannadagurinn haldinn hátíðlegur og þá verða opnar vinnustofur og gestum og gangandi boðið að kynna sér starfsemina.

„Í Íshúsi Hafnarfjarðar leigja einstaklingar og smærri fyrirtæki vinnustofur eða verkstæði undir ýmiss konar starfsemi í hinum og þessum skapandi greinum,“ segir Anna María Karlsdóttir mannfræðingur sem ásamt eiginmanni sínum, Ólafi Gunnari Sverrissyni, rekur Íshús Hafnarfjarðar.

„Húsið okkar hér við smábátahöfnina var upprunalega reist undir fiskverkun og hér var starfrækt frystihús og netaverkstæði fram til ársins 2001. Nú hefur þessi fallega bygging fengið nýtt hlutverk en fyrir tæpu ári tókum við húsið á leigu og nú eru hér 23 vinnustofur þar sem starfa meðal annars grískur hnífasmiður, keramikhönnuðir, myndlistarkonur, tréskipasmiður, skósmiður, textílhönnuðir og innan hússins er einnig starfrækt verkstæði sem sérhæfir sig í þrívíddarskurði.“

Anna María segir meðbyrinn frá upphafi hafa verið mikinn og að áhugi á starfseminni fari síst minnkandi. „Við tökum á móti hópum í skipulagðar heimsóknir og kynnum starfsemina en gestum býðst einnig að kaupa vörur beint frá hönnuðum og listamönnum hússins. Við erum einnig með verslun sem er opin alla fimmtudaga en seinna á þessu ári opnum við verslun í nýju rými í húsinu og rýmkum þá afgreiðslutímann til muna.“

Kraftmikið samfélag

Hönnuðir og listamenn Íshússins mynda ákveðið samfélag enda eru rýmin opin. „Hér er mjög fjölbreytt starfsemi og bæði smærri fyrirtæki og einyrkjar sem sumir voru áður við eldhúsborðið heima hjá sér að skapa. Hér hefur myndast samstarf milli fólks á ólíkum sviðum og við höfum öll mikið gagn og gaman af þessu samfélagi okkar. Við deilum hugmyndum og þótt allir séu að vinna að sínu þá koma upp óvæntir vinklar sem hægt er að vinna með öðrum. Íshús Hafnarfjarðar væri ekkert án fólksins okkar og það er mikill kraftur í húsinu,“ segir Anna María og brosir. 

Lifandi laugardagur er viðburður sem verslunareigendur við Strandgötu í Hafnarfirði standa saman að og hafa þeir þá opið hjá sér fyrsta laugardag mánaðarins. Í dag verður auk þess flóamarkaður á Thorsplani og túninu á móti Eymundsson og skottsala verður á bílaplaninu á milli Eymundsson og verslunarmiðstöðvarinnar Fjarðar.

Sjómannadagurinn verður haldinn hátíðlegur á milli 13 og 17 á morgun í Íshúsi Hafnarfjarðar enda eru tengslin við sjómennsku og fiskverkun mikil og sterk.

„Í tilefni dagsins verða vinnustofurnar hjá okkur opnar sem og verslun Íshússins og ef veður leyfir kemur starfsemin til með að flæða út og langleiðina niður að smábátahöfn,“ útskýrir Anna María og bætir við að hún vonist til að sjá sem flesta í Hafnarfirði um helgina en Hafnarfjarðarbær stendur fyrir veglegri dagskrá við Flensborgarhöfnina á Sjómannadaginn og hafnarsvæðið iðar jafnan af lífi.