Hitti hetjurnar sínar í Los Angeles

Hjólabrettakappinn Siggi P opnar sína fyrstu ljósmyndasýningu í The Coocoo's Nest á Grandagarði á morgun. Hún nefnist Reykjavík Los Angeles og er samansett af stórum svarthvítum filmuljósmyndum.

Eins og nafnið gefur til kynna var hluti myndanna tekinn í Los Angeles. „Ég fór í hjólabrettapílagrímsferð í mánuð til að hitta hetjurnar,“ segir Siggi, eða Sigurður Páll Pálsson og á þar við hetjur sínar úr hjólabrettabransanum.

Þar á meðal voru Jason Dill, Guy Mariano og Anthony Van Engelen. „Það var mjög gaman og rosalega mikil upplifun. Við vorum bara að spjalla og „skeita“.“

Siggi hefur stundað hjólabrettaíþróttina í tíu ár og segir senuna hér hafa stækkað mikið. „Það er alveg rosalega mikið af krökkum byrjaðir að „skeita“. Þetta er að stækka eins og ég veit ekki hvað.“