Ekki ólétt, bara að eldast

Söngkonan Lady Gaga sprakk á limminu um daginn, en hún gafst upp á þeim sögusögnum sem flogið hafa fjöllunum hærra upp á síðkastið um að hún sé ófrísk.

Tók Gaga sig til og lét aðdáendur sína heyra það á tónleikum í vikunni, þar sem hún sagði þeim að hún væri einfaldlega að eldast. Meint öldrun hefði þau áhrif á líkama hennar, að sumir héldu hana konu eigi einsamla. Kleip hún í lærin á sér máli sínu til rökstuðnings og benti á að hún ætti nú aðeins eitt ár í að verða þrítug.

Segja fjölmiðlar vestanhafs að hún hafi svarað óléttuorðrómi fullum hálsi, en verður víst hver að dæma fyrir sig hvort þetta hafi verið gott útspil.