Einbýlishús sem var í eigu forsætisráðherra og borgarstjóra til sölu á tæplega 140 milljónir

Einstaklega vel staðsett og mikið endurnýjað 350 fermetra einbýlishús í Laugardalnum er til sölu á tæplega 140 milljónir. Húsið er á tveimur hæðum á frábærum útsýnisstað í vinsælu og rótgrónu hverfi miðsvæðis í Reykjavík.

Geir Hallgrímsson, fyrrverandi forsætisráðherra, borgarstjóri og formaður Sjálfstæðisflokksins, bjó lengst af í húsinu ásamt fjölskyldu sinni enda hentar húsið vel fyrir hvers kyns móttökur og veislur ásamt því að vera notalegt og vel skipulagt fjölskylduhús. Arkitekt hússins er Gunnlaugur Halldórsson. Geir lést árið 1990, þá aðeins 64 ára að aldri. Geir var forsætisráðherra á árunum 1974-78.

Við húsið er rúmgóður bílskúr með rafmagni, vatni, hita og hurðaopnara, fylgir eigninni og er inngangur í hann jafnt að framan sem aftanverðu.

Komið er inn í sjálft húsið á efri hæð í flísalagt anddyri með flísalagðri gestasnyrtingu strax á vinstri hönd. Úr anddyri er gengið inn í parketlagt hol sem tengir saman helstu rými efri hæðar. Á hægri hönd er gengið inn í stóra og bjarta stofu sem tengist borðstofu á skemmtilegan máta. Hátt er til lofts og parket á gólfi í báðum stofum. Eldhús er á vinstri hönd úr holi og er það með nýrri og vandaðri, sprautulakkaðri innréttingu, góðum tækjum og akrýlstein á borðum.

Gott búr er inn af eldhúsi. Eldhús tengist vel sólstofu og borðstofu en útgengt er á stórar útsýnissvalir frá sólstofunni. Svalirnar snúa til suðurs og eru með góðu aðgengi niður í garðinn. Útfrá sólstofunni er líka innangengt í stórt bókaherbergi/vinnuherbergi með vönduðum, upprunalegum og fallega uppgerðum innréttingum, ásamt útgengi út á svalir.

Frá efri hæð er góður og nýlega teppalagður stigi niður á neðri hæð. Þar eru eftirfarandi rými: stórt hjónaherbergi með vönduðum skápum, og auk þess 3-4 svefnherbergi, þ.e. tvö hafa verið sameinuð í eitt stórt, en auðvelt væri að breyta því aftur. Öll herbergin eru með góðu eikarparketi á gólfum.

Stórt og endurnýjað baðherbergi með fallegum flísum, upphengdu klósetti, tvennum gluggum, baðkari og sturtu, og auk þess annað minna baðherbergi, flíslagt í hólf og gólf með sturtu, upphengdu klósetti og glugga með opnanlegu fagi. Mjög rúmgott þvottahús með góðu vinnu- og skápaplássi, tvennum gluggum og útgengi í einstaklega fallegan garð í góðri rækt og með rúmgóðri útigeymslu. Innaf þvottahúsi er einnig fín geymsla sem og innaf gangi en þar eru einnig góðir skápar.