Tilkynning frá Landspítalanum: Fresta þarf meginþorra skipulagðra skurðaðgerða

Fresta þarf meginþorra skipulagðra skurðaðgerða og sérhæfðra meðferða, til að mynda hjartaþræðingum, á meðan á verkfalli félaga í BHM stendur. Þetta segir í fréttatilkynningu frá Landspítalanum.

„Búast má við að skipulagðir keisaraskurðir verið færðir til. Þá mun verkfallið raska áhættumæðraeftirliti, skipulagningu geislameðferða nýgreindra krabbameinssjúkra, svefnrannsóknum og fleiru.“

Á morgun 7. apríl hefst ótímabundið verkfall Félags geislafræðinga, Félags íslenskra náttúrufræðinga, Félags lífeindafræðinga og Ljósmæðrafélags Íslands.

Um 500 starfsmenn Landspítala munu leggja niður störf. Verkfallsaðgerðir lífeindafræðinga verða á degi hverjum milli kl. 08-12 og aðgerðir ljósmæðra á þriðjudögum, miðvikudögum og fimmtudögum.

Í tilkynningunni segir að Landspítalinn muni eftir sem áður sinna allri bráðastarfsemi og hvetur alla sem telja sig þurfa slíka þjónustu að draga ekki að leita til spítalans.