Förðunarfræðingur Lady Gaga til Íslands

Förðunarmeistarinn Orlando Santiago er væntanlegur til landsins en hann verður með viðburð fyrir förðunarfræðinga og áhugafólk um förðun föstudaginn 9. janúar á Rúbín. Þar mun hann sýna hvernig hann farðar stjörnurnar og svara spurningum um förðun og snyrtivörur.

Santiago hóf feril sinn hjá snyrtivörudeild Christian Dior. Síðan þá hefur hann meðal annars séð um förðun í myndböndum Lady Gaga síðustu þrjú ár, unnið fyrir frönsku útgáfu tímaritsins Vogue, starfað hjá snyrtivörurisanum MAC til fjölda ára og var yfir teyminu sem hannar förðunarlínur þeirra. Að auki er hann með sinn eiginn förðunarskóla.

Förðunarfræðingurinn Bryndís Kristofer sá um komu hans til landsins. Hún kynntist Santiago á The Makeup Show, einum stærsta förðunarviðburði og -sýningu í heimi fyrir fagfólk.

„Ég bý í Orlando og fór á sýninguna þar og hitti Santiago, en hann var að kenna. Við náðum svo vel saman að ég bauð honum að koma til landsins og halda smá námskeið,“ segir Bryndís.

Hún lærði förðun árið 2012 hjá MOOD Makeup School á Íslandi og þaðan fór hún til Parísar að læra augabrúnasérfræði og starfar sem slík í Orlando í dag.

„Það er mikill heiður að fá hann til landsins þar sem flestir förðunarfræðingar af þessari gráðu eru ekki að kenna lengur. Hann byrjar á því að sýna nokkrar gerðir förðunar og svo ætlar hann að svara spurningum, svo það er um að gera að vera tilbúinn með spurningar handa honum,“ segir Bryndís.

Í framhaldi af námskeiðinu hér heima vonast þau til þess að geta flutt The Makeup Show til Skandinavíu, en verið er að skoða að halda sýninguna í Danmörku.

„Það er ekkert sambærilegt þessari sýningu í Skandinavíu, svo við vonumst til þess að geta farið með þetta lengra og að námskeiðið hér verði kveikjan að meiru. Það yrði gott fyrir þennan bransa og myndi auka samskiptin og styrkja tengslanetið á milli förðunarfræðinga,“ segir Bryndís.

Viðburðurinn er haldinn á Rúbín, hefst klukkan 19.00 og kostar 4.500 krónur inn.