Rollur rúnar að vori

Vorið er rétt handan við hornið og vetrarrúningur á sér stað víða um land. Matt er einn úr hópi farandrúningsmanna frá Bretlandi. Hópurinn hefur dvalist á landinu undanfarna daga og hefur rúið um 2.500 kindur. Þegar ljósmyndara Fréttablaðsins bar að garði, á bænum Efri-Brunnastöðum á Vatnsleysuströnd, var hópurinn önnum kafinn við að rýja kindur en á Efri-Brunnastöðum höfðu um 80 kindur verið rúnar.

Kristmundur Skarphéðinsson, bóndi á Efri-Brunnastöðum, segir hópinn ferðast víða og hafa meðal annars komið við á hinum Norðurlöndunum. „Í fyrra kom hingað hópur frá Nýja-Sjálandi til að rýja kindur,“ segir Kristmundur. Hann hefur stundað búskap um árabil. „Hér hefur verið búskapur lengi, þegar mest var voru um 500 kindur á bænum en það minnkaði nokkuð eftir árið 1991, nú eru þær um 80,“ segir hann.