Kvenfélagið Hringurinn fagnar 111 ára afmæli

Um þessar mundir á kvenfélagið Hringurinn 111 ára afmæli. Markmið félagsins er, og hefur alltaf verið, að vinna að líknar- og mannúðarmálum sérstaklega í þágu barna.

„Í félaginu eru um 350 konur sem eru mjög samstilltar og áhugasamar um starfið,“ segir Sonja Egilsdóttir, formaður félagsins. Sonja tók við starfinu í maí í fyrra en á árinu gaf félagið gjafir og styrki fyrir 140 milljónir króna.

„Á 110 ára afmæli félagsins í fyrra afhentum við Barnaspítala Hringsins 110 milljónir króna, eina milljón fyrir hvert ár sem félagið hefur verið til,“ segir Sonja. Þrjátíu milljónum var því varið að auki í önnur verkefni á árinu.

Auk áðurnefndra milljóna hlaut Barnaspítali Hringsins hjartalínuritstæki á hjólastandi, tíu pela- og sprautuhitara auk ristil- og magaspeglunartækja. Græjurnar voru keyptar fyrir fjármuni, alls sex milljónir króna, sem söfnuðust í bjóráskorun á meðal notenda samskiptavefsins Facebook.

Barna- og unglingageðdeild Landspítalans hlaut nauðsynlegan búnað í læknisskoðunarherbergi, fósturgreiningardeild kvennadeildar LSH ómskoðunartæki, svæfinga- og gjörgæsludeild LSH sérhæft tæki til barkaþræðingar í börnum og gjörgæslu- og vöknunardeild LSH fékk fjármagn til að bæta aðstöðu í aðstandendarýmum. Að auki hlutu Ísbjörninn Hringur, Sjónarhóll, Rjóðrið, Dropinn og Lyngás styrki.

„Starfið í ár verður mjög hefðbundið hjá okkur. Helstu fjáraflanirnar okkar eru jólabasarinn, jólakortin og jólakaffið okkar,“ segir Sonja. Vinna við undirbúning þessara viðburða stendur allan veturinn. Yfir vetrarmánuðina hittist hópur tvisvar í viku til að vinna handavinnu sem verður til sölu á jólabasarnum. Sá fer yfirleitt fram fyrsta sunnudag í nóvembermánuði.

Í mars hefjast þær handa við að undirbúa jólakortasöluna. Kortin eru sett upp og send í prentun. Í september byrjar vinna við að brjóta kortin saman og setja í umslög. Það verk vinna um þrjátíu konur einu sinni í viku fram að jólamánuðinum. „Allt okkar starf er unnið í sjálfboðavinnu. Það er engin yfirbygging hjá okkur heldur fer allt beint í styrki,“ segir Sonja.

„Ef við sjáum einhvers staðar þörf fyrir styrki leggjum við enn meir á okkur til að hjálpa.“

Í tilefni afmælisins munu Hringskonur hafa afmæliskaffi fyrir meðlimi félagsins um komandi helgi. Öðrum velunnurum sem vilja halda upp á daginn er bent á að alltaf er hægt að styrkja félagið en reikningsupplýsingar þess má finna á heimasíðunni hringurinn.is.