Gáfu Barnaspítala Hringsins 110 milljónir

Kvenfélagið Hringurinn fagnaði 110 ára afmæli sínu í dag og veitti af því tilefni Barnaspítala Hringsins 110 milljón króna gjöf sem gerir spítalanum kleift að vera meðal þeirra fremstu í heiminum.

Hringskonur fjölmenntu í afmælishófið í dag enda tilefnið ærið. Kvenfélagið Hringurinn fagnaði 110 ára afmæli sínu en félagið var stofnað 26. janúar árið 1904. Hringskonur hafa í gegnum tíðina látið sér velferð barna varða og stutt dyggilega að aðbúnaði barna á barnaspítalanum sem að lokum fékk nafn kvenfélagsins.

Í dag veittu Hringskonur barnaspítalanum mjög rausnarlega gjöf eða 110 milljónir króna sem verða nýttar til tækjakaupa á deildum spítalans. „Við Hringskonur eru afar stoltar af því að geta gefið svona góða gjöf. Við vitum það að þetta fer á frábæran stað. Allt fyrir börnin okkar,“ sagði Valgerður Einarsdóttir, formaður kvenfélagsins Hringsins.

180 milljónir á rúmum tveimur árum

Hringskonur eru heldur betur öflugar því fyrir tveimur árum fékk Barnaspítali Hringsins 70 milljón króna gjöf frá kvenfélaginu og því alls um 180 milljónir króna á rúmum tveimur árum.

„Þær hafa stutt barnaspítalann bæði með húsnæði og tækjabúnaði. Við erum sambærilega tækjum búin og bestu barnaspítalar í heiminum,“ segir Jón Hilmar Friðriksson, framkvæmdastjóri kvenna og barnasviðs LHS.

Of Monsters and Men fjármagnaði blöðruómskanna

Barnaspítali Hringsins fékk 148 milljónir króna í styrk á síðasta ári. Íslenska stórsveitin Of Monsters and Men veitti spítalanum einnig rausnarlegan styrk sem nýttur var til kaupa á blöðruómskanna. Langstærsti styrkurinn kom hins vegar frá Hringskonum.

Nánar í myndbandinu hér að ofan.