Þrjú stærstu félögin leggja fram kröfugerð

Samninganefndir SFR, stéttarfélags í almannaþjónustu, Sjúkraliðafélags Íslands, og Landssambands lögreglumanna lögðu í dag fram sameiginlega kröfugerð félaganna fyrir komandi kjarasamningsviðræður. Félögin þrjú eru þau stærstu innan BSRB sem semja við ríkið. Þetta kemur fram í tilkynningu frá SFR.

Fundur með samninganefnd félaganna og samninganefnd ríkisins fór fram í húsakynnum ríkissáttasemjara í dag. Kröfugerðin skiptist í tvo hluta, annars vegar er um að ræða sameiginlegar kröfur félaganna og hins vegar sérkröfur hvers félags fyrir sig.

Félögin krefjast meðal annars hærri launa, styttri vinnuviku, að kynjabundnum launamun verði útrýmt og að laun verði jöfnuð eða leiðrétt á milli opinberra starfsmanna og starfsmanna á almennum vinnumarkaði.

Hópurinn sem samið verður fyrir telur rúmlega 5200 manns. Innan Landssambands lögreglumanna eru rúmlega 600 félagsmenn sem allir starfa hjá ríkinu, Sjúkraliðafélags Íslands sem semur fyrir um 1100 starfsmenn hjá ríkinu og innan SFR stéttarfélags eru rúmlega 3500 manns hjá ríkinu.